Aizawl, Nohprah 17 :Shibynta ban tehlakam ha kaba iadei bad ki kam khaii drok, khaii kwai bad kiwei pat ki kam khaii beain, na ka liang ka sorkar Mizoram ha ka 15 tarik mynta u bnai kala shim ia ka rai ban thaw da ka kynhun ”Task Force”.
Katkum ka khubor heh sorkar, kane ka kynhun task force kan kynthup ia ki heh sorkar na ka tnat kam pohiing bad ia ka rai halor kane ka bynta la shim ha ka jingialang ba la khot pynlong da u Myntri Rangbah (CM) ka jylla u Zoramthanga.
Nalor u Zoramthanga, kiba bun kiwei pat ki heh sorkar bad ki nongialam na ka seng Central Young Mizo Association kila iashim bynta lang ha kane ka jingialang, ha kaba kila mynjur ruh na ka bynta ban thaw ia ki jaka ap pahara ha ki bynta khappud jong ka ri.
Ha kajuh ka por na ka liang ki bor pulit ka jylla ruh kin iarap lem ia ki volunteer jong ka kynhun lem bad kiwei pat ki kynhun seng bhalang khnang ba kin lah ban iakhun pyrshah ia ki kam khaii drok beain.
Lah ban kdew ba ka Champhai district ka jylla dang shen kala sakhi halor ka jingkiew jong ki kam khaii beain, kata kum u drok, u kwai bad ki jait mrad kiba kham pher napoh Myanmar.
Dang shen ki nongrep kwai ka thain kila thang noh ia hynriew tylli ki trok kiba kit ia u kwai Burma ha Mamit district ha ka thain sepngi ka Mizoram, kata da kaba kynnoh ba ki iew ki hat ki jong ki kila shah ktah jur namar ka jingwan rung u kwah beain napoh Burma.
Ka Mizoram ka don ia ka jaka khappud kaba jngai palat 500 km bad ka Myanmar bad 318 km bad ka Bangladesh.
