Shillong, Jymmang 19 : Ka Sorkar Meghalaya Democratic Alliance (MDA) hynne ka sngi Thohdieng, kala rai ban thung da ka Committee on Roster System haba pynbna ruh ban pynsangeh shuwa ia baroh ki jingthungkam ba thymmai tad haduh ban da shim rai halor ka Roster.
Ia kane ka rai la shim hadien ka jingialang jong ka All Party Meeting bala pyniaid da u Myntri Rangbah ka Jylla Conrad K Sangma, bala pynlong ha Secretariat.
Ki Nongialam jong baroh ki seng sain pyrthei kiba don ha Liang Synshar bad Liang Pyrshah kila wan iashimbynta ha ka jingialang.
Ki Nongialam jong ka Liang Pyrshah Voice of the People Party (VPP) bad ka Khun Hynniewtrep National Awakening Movement (KHNAM) kila mih jyndat na ka jingialang kum ka jingpyrshah ia ka jingbym lah ka Sorkar Jylla ban iakren halor ka jingdonkam ban bishar thymmai ia ka State Reservation Policy.
Hadien ka jingialang, u Conrad ula pyntip ba ia kane ka Committee on Roste System yn khlieh da ka Myntri ka Koit ka Khiah Kong Ampareen Lyngdoh.
Kane kala mih hadien ki jingsngewkhia bala pynsngew bad ki jingpan jingshai na ki seng sain pyrthei halor ka roster system hadien ka jingpyni ia ki jingbatai ba bniah sha ki hadien jong ka jingialang.
Therefore, in order to ensure that all the concerns are clarified, a Committee chaired by Hon’ble Minister, Smti. @ampareenlyngdoh will be constituted with members from various political parties.
Considering the suggestions of the members of different political parties, the…
— Conrad K Sangma (@SangmaConrad) May 19, 2023
“Namar kata, ngi la rai ba khnang ban pynthikna ba ki jingpynshai kin don ia baroh ki jingsngewkhia, la tyrwa ban thaw ia ka Committee ka ban khlieh da ka Myntri ka Koit ka Khiah Kong Ampareen Lyngdoh bad ki dkhot kin long na ki seng sain pyrthei bapher bapher” ong u Conrad haba iakren bad ki nongthoh khubor.
“Ngi sa ailad ia ki ban pan ia ki jingpynshai bad ban nang ai shuh shuh ia ki jingai jingmut ba kumno ki tyrwa ne ai jingmut ba ngi dei ban jam shakhmat” ula bynrap.
U Myntri Rangbah ula pynbna ruh ba ka Sorkar Jylla kala mynjur ruh ia ki jingkyrpad jong ki seng sain pyrthei ban pynsangeh shuwa ia baroh ki jingthungkam ba thymmai tad haduh ba ka Committee kala aiti ia ka kaiphod halor ka Roster System.
“Ngi la mynjur ia kane kum ka Sorkar ban gin pynsangeh shuwa ia baroh ki jingthungkam tad haduh ba ka Committee kala hun bad ai sha ngi ia ka kaiphod ba khatduh bad ngin sa pynlong biang ia ka jingialang ba khatduh kaba ngi khmih lynti ban sa long noh hi shen” ula ong.
U pyntip ba ka Sorkar kan sa pynmih noh mar mar ia ki kyndon treikam jong ka Committee bad ka Committee ruh kan sa lum jingialang noh shen hi.
Hynrei u Myntri Rangbah ula ong ba hadien ka jingiatai bad ka jingbatai, kiba bun ki seng sain pyrthei kila pynpaw ba kila hun bad ka jingiatai halor ka roster. Ul pyntip ruh ba la ai jingpynshai halor ka kam ba iadei bad ka kam pule dangle la ka roster system ka treikam ne em.
“Ngi la pynshai ba ka roster ka dei tang ia ka kam thungkam thungkam bad kumta, kam dei satia kaba mut pyntreikam ha ka kam pule dangle ban ai bhah pule ha ki jaka pule bapher bapher kiba don ha kylleng ka Ri” ula ong.
Haba pynshairuh ba ka Sorkar Jylla kam don jingthmu ban pyntreikam iaka roster system naduh u snem 1972, u Myntri Rangbah ka Jylla ula pyntip ba ia kane ka kam la dep ruh ban batai sha baroh ki seng sain pyrthei.
“Nga kwah ban pynshai mynta ka sngi ba baroh ki jingthungkam kiba la leh ha ki snem bala leit noh bad baroh ki rai bala shim, ki dei kiba la shim kat kum ka Reservation Policy bad kumta, ki dei kiba ka Sorkar ka hap ban bud. Kumta, ka jingkylli ban phai dien bad ban khmih biang ia ka lane pynduh pyndam lane pynbeit hangne hangtai kam mih satia. Kine kijingthungkam baroh ki dei kiba la leh kat kum ka State Reservation Policy”.
Haba kylli, u Conrad ula ong “Ngi la batai ia baroh ba ka roster syste ka dei ka kam ba hap iai bteng. Kala sdang naduh u snem 1972 bad kan dang iai bteng. Ka long kaba donkam ia ngi ban sngewthuh ba ka snem bas dang namar ka ailad ia ngi ban sngewthuh hangno ngi don ha ka roster mynta”.
“Hynrei haba ngi ong ia kane, ngi hap ban kynmaw ba ha ki 50 snem bala leit, kaei kaba la jia ha ka jingthungkam bala leh ha ka roster system ka dei kaei kaei kaba la leh kat kum ka reservation policy bad halor ki rule jong ka reservation policy. Kumta, ia ngi mynta ban gin phaidien biang sha ki jingkhein jingsiah, sha ka jingthungkam bala leh bad ka lynti bala shim, kam dei satia ka kam kaba ngin lah ban leh bad ban wanrah ia ka jingkylla ia ka. Kumta, ki jingkhein ba ki jingtip ki ailad ia ngi ban sngewthuh hangno ba ngi don mynta”ula ban jur.
