Shillong, Nailur 26 : Ka sorkar Jylla kala thung ia ki lai tylli ki Regional Committee on Boundary Dispute ki ban pyniaid shakhmat ia ka jingiakren iapynbeit pud jong ka wat ba-ar na ka bynta ki hynriew tylli ki jaka ba dang sah, kiba dei ruh ki jaka ba jur ka jingiakynad.
Ki jaka kiba la buh ban iakren ha ka wat ba-ar jong ka jingiakren pynbeit pud ki kynthup ia ka Block-I, Psiar-Khanduli kiba hap hapoh ka West Jaintia Hills, Block-II ha Ri-Bhoi, ka Langpih West Khasi Hills,, Nongwah Mawtamur bad Deshdemoreah.
Kat kum ka jingpynbna da u Chief Secretary ka Jylla Bah D.P Wahlang, la ong ba ki kyndon treikam jong kine ki Committee ki long ba kin iatreilang bad ki Regional Committee bala thaw da ka Sorkar Assam.
Ban iapynshisha bad pynthikna ia ki kyrteng jong ki Shnong (kyntoit) bala kam da ka Meghalaya bad ka kyrteng jong ki Shnong kat kum ki kot ki sla ka Assam.
Ban bishar ia ka jinglong jingman jong ki Nongshongshnong jong kine ki Shnong kat kum ka khana samari kynthup ia ki jaidbynriew ba ki dei.
Ban pynkhreh ia ka thup jong ki Jingtei ka Sorkar kiba don ha kane ka Shnong, kiba la tei da baroh artylli ki Sorkar Jylla.
Ban leit iuhjat ha kine ki Shnong, iakren bad ki Nongshongshnong ba sah ha kine ki shnong lem bad ki Nongmihkhmat jong ki Autonomous District Council bad kiwei kiwei ki knhun ban tip ia ka jingkwah jong ki paidbah ba shong ba sah ha kine ki jaka.
Ban buh jingthoh ia ki jingtip ba iadei bad ki jingjngai jong kine ki Shnong na ki Ophis treikam ka Sorkar bad kiwei kiwei.
La buhpor ruh ba kine ki Committee ki dei ban aiti ia ki kaiphod sha ka Sorkar Meghalaya hapoh ka 45 sngi naka sngi ba pynmih ia kane ka jingpynbna.
La ong ba kane ka kaiphod ka dei ka ban pynshong nongrim na ki jingleit jurip ia kine ki Shnong bad ka jingpynshong nongrim na ki sienjam ba la mynjur lang la ka dei na jingbishar ia ka histori, ka jingdon ki jaidbynriew, ka jingsuk ka synshar khaddar ia ki nongshongshnong, bad ka jingkwah jong ki briew ba sah ha ka thain.
Kine ki Regional Committee ki kynthup ia ka Ri-Bhoi District kaba la khlieh da u Symbud Myntri Rangbah ka Jylla Bah Prestone Tynsong kum u Chairperson, ka West Khasi Hills ka ba la khlieh da u Bah Renikton Lyngdoh Tongkhar Myntri ka Tnad PHE kum u Chairperson bad ka West Jaintia Hills bala khlieh da u Bah Sniawbhalang Dhar Myntri ka Tnad Urban Affairs kum u Chairperson.
