Shillong, Jylliew 01 : Ka Sorkar Jylla kala thaw mynta ia ka ‘Expert Committee’ ne ka Committee ki stad ki jhad, ka ban shong bishar thymmai ia ka State Reservation Policy.
Ia kane la pynbna da u Chief Secretary ka Jylla Bah D.P Wahlang haba pynmih ia kane ka jingpyntip (notify) bala thaw ia ka ‘Expert Committee’ hynne ka sngi Palei, kaba la wan lyngba ka Tnad Personnel & A.R (B) ka Sorkar Jylla.
Kat kum kane ka jingpyntip la ong “U Lat ka Jylla u sngewbha ban pyntip halor ka ‘Expert Committee’ ka ban shong bishar thymmai ia ka State Reservation Policy kumba la pyntip ha ka Resolution PER. 222/71/138 bala pynmih ha ka 12 tarik Kyllalyngkot 1972”.
La ong ba u/ka Chairperson bad ki Dkhot jong ka Committee kin kynthup ia ki stad ha ka Constitutional law, Economics, Sociology, Demographic studies (ka jingdon bun paid), bad kiwei kiwei ki bynta ki ban sa pyntip da ka Sorkar Jylla.
Kane ka Committee kan shong bishar thymmai ia ka State Reservation Policy da kaba shim ia ki jingai jingmut na baroh ki kynhun ka imlang sahlang bad ruh da kaba leit iuhkjat sha baroh ki bynta jong ka Jylla.
Lah ban kdew, kane ka jingpyntip ka Sorkar kala mih tang shisngi hadien ba ka Committee ki seng sain pyrthei kaba iakynduh hynnin ka sngi,kala rai ban tyrwa sha ka Sorkar Jylla ban thaw ia ka ‘Expert Committee’ ka ban shong bishar thymmai ia ka Reservation Policy.
Haba pynbna paidbah ia kane lyngba ki lad pathai khubor, ka Nongaitien ka Sorkar bad Myntri ka Tnad Ain Kong Amapreen Lyngdoh kala ong “Kane ka jingpyntip ka Sorkar bala thaw ia ka Expert Committee ka dei kaba mih na ka jingialang jong baroh ki seng sain pyrthei ba long hynnin ka sngi”.
Ka Kong Ampareen kaba dei ka Chairperson ka Committee kala ong ba kan long kaba bakla ban ngeit baa ne ka kam ka dei kaba la pynpaw jingsngewkhia tang da kawei ne ar tylli ki kynhun.
Hynrei halor ka jingbuhpor ia ka Expert Committee, ka Chairperson kala ong ba kam shym la don satia kano kano ka jingbuhpor ne ka sngi bad ong “Ngi lah ong ba ngin leh (bishar thymmai), katno kan shimpor ka dei ka kam kaba ka Sorkar kan sa peit. Ngam kwah ban buh ia kano kano ka por namar kam iahap satia. Hynrei, ki paidbah kila peitngor bha bad ngi kyrmen ba ngin pyndep kloi ia kane ka kam kham kloi kat kaba lah”.
Ka Chairperson kala kyntu ia baroh ki seng sain pyrthei ban iaid kat kum ka rukom ba dei ban iaid halor kane ka kam. “Phah sha ngi da ka jingthoh, pynshong nongrim bha ia ki jingai jingmut khnang ba ka Committee kan ioh iatai kumba ka long ia kane ka kam ha ryngkat ki jingai jingmut ba buh da kiwei ki mamla”.
Ka Kong Ampareen kala kyntu ia baroh ki seng sain pyrthei ba kin phah noh ia ki jingai jingmut da ka jingthoh hapoh ka 15 sngi.
