Shillong, Risaw 31 : Ka Sorkar Jylla ha ka jingpynbha, kala thaw ia ka scheme ban buh song pisa ha ki kti jong ki Deputy Commissioner lyngba ki District Task Force (DTF) khnang ban pyntreikam ia ka Meghalaya Residents Safety and Security Act (MRSSA) 2016 ha Jylla.
Khnang ban pyntreikam ia ki kyndon jong ka Ain, la thaw ia ki District Task Force ha kaba ki Deputy Commissioner ki dei ki Chairperson bad ki Additional Deputy Commissioner/Asst Commissioner kum ki Secretary.
Ki dkhot jong ka Task Force kin kynthup ia ki Superintendent of Police, Inspector ka Supply, Inspector ka Labour, Inspector (Infiltration Branch), Anti-Infiltration Directorate, ki nongmihkhmat na ki Autonomous District Council bad arngut ki non-official member ki ban dei na ki bor shnong.
Ka jingthmu jong ka Meghalaya Residents Safety and Security Act (MRSSA), 2016 ka long eh ha kaban pynthikna ia ka jingpynkhlain ia ka jingpeit bniah ia ki nongshong wai bad ban pynthikna ia ka jingshngain bad jingiada jong ki nongshong shnong ka Jylla da kaba khanglad ia ki kynhun bymman ban ioh jaka rieh ha ka Jylla kaba lah ban ktah ia ka suk ka sain, ban pynshisha bad teh kyndon ia ki nongshong wai kiba sah ha ki iing ba la ai wai ha ka Jylla, ban thaw ia ki District Task Force bad ki Facilitation Centre, ban pynsuk ia ka jingpyntreikam kaba paka ia ki ain bapher bapher bad na ka bynta ka jingshngain jong ki nongshong shnong.
