Shillong, Jymmang 15 : Ka Sorkar Jylla kala thaw ia ka Committee ba kyrpang kaba khlieh da u Chief Secretary, ha kaban wanrah ia ki jingpynkylla bad jingpynbeit ryntih ia ka rukom treikam bad ka koit ka khiah ka pla iarong tyngka jong ki lai tylli ki Autonomous District Council (ADC) ka Ri-lum Khasi, Jaintia bad Garo.
Ia kane ka rai la shim ha ka jingialang bala pyniaid da u Myntri Rangbah ka Jylla Conrad K Sangma haka jingiadonlang u Symbud Myntri Rangbah ba khmih ia ka District Council Affairs (DCA) Bah Prestone Tynsong, kaba long hynne ka sngi Balang.
Ki Nongmihkhmat na ki lai tylli ki ADC- ka Khasi Hills Autonomous District Council (KHADC), Jaintia Hills Autonomous District Council (JHADC) bad Garo Hills Autonomous District Council (GHADC) ruh kila iashimbynta ha kane ka jingialang.
Haba kren sha ki lad pathai khubor, u Conrad ula ong ba kane ka jingialang ka dei kaba la pynlong ban kynjoh ia lai tyli ki thong-ban khmih ia ka rukom pyniaid bad ki Rules bapher bapher, ban pynkhlain ia ka pla iarong tyngka bad ban pynkhuid lut ia baroh ki Bill ba sahteng bala mynjur da ki lai ADC.
“Ka jingiakren kaba bniah bha kala mih bad ngi la thaw ia ka Committee ba kyrpang, ka ban khlieh da u Chief Secretary bad ki Ophisar ka District Council kum ki Dkhot bad kano kano ka jingbtin lynti bad jingkyrshan ba donkam yn sa ai ban pynthikna ba kan poi sha ka thong” ula ong.
Kat kum ka jingong jong u, kane ka Committee kan ai ka jingkyrshan bad jingbtin lynti ia ki District Council ban pynthikna ba ki Rules bapher bapher, ka pla tyngka lane ki nongtrei lane ka policy thied jingthieng kan don noh ha ki kyrdan bapher bapher.
“Ngi la buh ia ka roadmap (lynti iaid) bad ka Committee kin sa shong bishar na ka por sha ka por iakine ki bynta ban kin khmih ba kumno kin lah ban pynkhlain ia ka pla iarong tyngka jong ki ADC” ula bynrap.
Haba kylli, u Conrad ula ong “Ngi la iakren ia ka jingeh ba mad da ki ADC ha ka pisa tyngka kynthup ka jingdon ki nongtrei. Kum ka nuksa, ngi iohi ha GHADC ki don kumba 1500 ngut ki Nongtrei bad san snem mynshuwa kila don haduh 2500 ngut ki Nongtrei bad ka tulop kala jan kot sha ka T.5 klur shibnai. Kumjuh ruh ka JHADC ka don hapdeng 1200-1400 ngut ki nongtrei bad kine ruh kila mad ia kajuh ka jingeh namar ka jingbun palat ki nongtrei katba ka KHADC ka don tang hapoh ka 800 ngut ki nongtrei”.
U Conrad ula ong ba la bthah mynta ia ki ADC ba kin thung ia ki riew shemphang ban pynthikna ia ka jingnang pynkhlain ha ka kam pynmih pisa bad khajna hala ki jong ki Council.
Haba iadei bad kiwei pat ki kam ba iadei bad ka song pisa jong ka 15th Finance Commission, u Conrad ula ong “Ki don katto katne ki kam kiba hap ban pynbeit bad ka dang don bun ka pisa ban ioh na ka Sorkar Pdeng bad kumta donkam ban pyndep ia ki katto katn eki kot ki sla bad hadien kane ngin sa nang ioh shuh shuh ia ka song pisa na ka Sorkar Pdeng…kine ki dei ruh ki kam kiba ngi la iakren”.
Ha kajuh ka por, ka Sorkar kala ban jur ia ka jingdonkam jong ki lai tylli ki ADC ba kin buh jingthoh ia ki jingleh tynrai ban pynneh pynsah ia ka spah kolshor jong ki lai tylli ki Jaidbynriew riewlum ka Jylla.
