Shillong, Iaiong 03 : Ka Sorkar Jylla kala thaw ia ka All Party Committee ( komity jong baroh ki seng sain pyrthei) ba kan iakren bad iasyllok halor ka jingtyrwa ban pynbna “Winter Capital” ha Tura.
Kane ka rai kala mih haba jubab ia ki jingdawa jong ki Sengbhalang bapher bapher ka Ri-lum Garo kiba dawa ia ka Winter Capital ha Tura ban pynsuk ia ka rukom treikam bad ki jingshakri ka Sorkar nalor ban pynbiang tarajur ia ka roi ka par ha baroh kawei ka Jylla.
Ki kyndon treikam jong kane ka Committee ki kynthup ia ka jingwad bniah ia ki lad ki lynti ba lah ban buh ia ka Winter Capital ha Tura bad ban bishar ruh ia ki jingiohnong bad ki jingduhnong.
Ka Committee kan sa pan jingmut ruh na baroh ki kynhun bapher bapher hashuwa ba kan aiti ia ka kaiphod sha ka Sorkar.
Nalor kane ka Committee halor ka Winter Capital, ka Sorkar kala thaw ruh sa ia kawei ka Committee ka ban shong bishar ia ka jingtyrwa ban wanrah ia ka lynti rel ha Meghalaya.
Ia kane ka Committee la bynshet ba kan wad ia ki lad ki lynti ban lah shna lynti rel, ban pynlong ia ka jingbishar bniah ia ka jinglut jingsep bad ban pynlong ia ki jingiakren bad ki kynhun bapher bapher shwa ban aiti ia ki jingai jingmut jong ka sha ka sorkar jylla.
Kine baroh artylli ki Committee ki kynthup ia ki Nongmihkhmat na baroh ki seng sain pyrthei bala ithuh bad bala register bad yn khlieh ia ka da u Myntri Rangbah ka Jylla lane ki Myntri ki ba un bynshet kam.
Kat kum ki jingpynbna ba pynmih da ka Sorkar, la kyrpad ia baroh ki seng sain pyrthei ba kin phah kyrteng ia arngut ki briew sha kane ka Committee.
Nalor kane, ki tnad Sorkar ba dei khmih ia kane ka kam kin sa shah khang lang ban iashimbynta ha ki jingialang jong ka Committee.
 ba kan iakren bad iasyllok halor ka jingtyrwa ban pynbna “Winter Capital” ha Tura.){kind=link}