Thaw histori ka VPP ha KHADC | Wanrah ia ka mang tyngka 2025-26 ba pan pisa ban pynlut ha u 2024-25

Shillong, Jylliew 24 : Ka Voice of the People Party (VPP) kaba ialam ia ka Executive Committee (EC) ha Khasi Hills Autonomous District Council (KHADC), ha ka sngi Ba-ar, kala thaw histori kum ka EC ba nyngkong eh ba hap mad ia ka jingshah pynwai ka Dorbar hapdeng ka jingwanrah ia ka Mang tyngka.

Ka Kynhun Liang Iatei ka KHADC, kala hap ban mih jyndat na ka Iingdorbar thaw ain ban pyrshah ia kane ka rai jong ka EC ka VPP-kaba wanrah ia ka mang tyngka kaba pura ha ka rukom kaba long bei-riti hapoh ka Dorbar Lyiur, kaba dang sdang hynne ka sngi Ba-ar.

Kane ka jingmih jyndat kala jia hadien ba u Chairman jong ka Council Bah Strong Pillar Kharjana ula pynbna ia ka rai ban shah ia ka EC ba kan wanrah ia ka mang tyngka ba pura jong u snem 2025-26 hadien ba wanrah ia ka sha ka jingiavote.

Ha ka sien ba nyngkong eh ha ka histori jong ka Jylla, ia ka Dorbar la hap ban pynwai hashuwa ba ka EC kan wanrah ia ka mang tyngka ba pura jong u snem 2025-26 hadien ba ka kynhun Liang Iatei kala pyrshah ia ka jingpaw ka sub head bala jerk um ka supplementary expenditure u snem 2024-25 ha ka mang tyngka ba pura, ia kaba ki ong ba ka long kaba “beain”.

Kat kum ka jingong ka Liang Iatei, ka rule 111 kala kren shai ba “kano kano ka supplementary expenditure lane supplementary demand dei ban wanrah hapoh ka Iingdorbar hadien bala mynjur ia ka mang tyngka”.

Ka supplementary expenditure u snem 2024-25 bala kynthup lang ha ka mang tyngka la kam ba ka dei kaba iaid sha ka tulop jong ki nongtrei, kiba shah ktah ha ka rai ba dang shen jong kane ka EC ba mynta, ba wengkam ia ki bad khein iap ia ka hukum thungkam pura ia ka jingshakri jong ki, ka kam kaba dang sah mynta hapdeng ka jingbishar jong ka Iingkashari Meghalaya High Court.

Hadien ba la pynlong biang ia ka Dorbar bala pynsangeh kumba 2 kynta eiei, u Executive Member ka Tnad Finance Seiborlang Warbah ula pynksan ia ka rai jong ka EC ban kynthup ia ka supplementary expenditure ha ka mang tyngka ba pura bad ong “Kam don satia ka rule kaba khang ia ngi ban kynthup ia ka supplementary expenditure. Kumta, ngi dei ban shah ban pyniaid shakhmat bad ka jingwanrah ia ka mang tyngka”.

Kat kum ka jingong u EM, ka EC kam don jingtip satia ia ki jingbym biang kiba iadei bad ka jingthungkam ha ki kam ki bym shym la mang haba wanrah bad mynjur ia ka Vote on Account ha u Lber mynta u snem.

“Haba iadei bad ka vote of account bala wanrah da ka EC ha kato ka por, ngi khlem lap ia kane ka jingbym biang. Ka dei tad hadien ba ka Committee bala thaw da ka EC, ngi shem ba kine ki kam ki dei kiba khlem mang. Kumta, ka supplementary demand ka dei kaba mang kyrpang ia kane” ula pynshai haba kyntait ban ai ia kano kano ka jingkular ban pynbeit ia kine ki jingleh bym shonghok.

Namar ka jingbym hun ia ka jubab u EM, u Nongialam ka Liang Iatei Bah Titostarwell Chyne ula ong “Kumno ngin pdiang ia ka mang tyngka kaba long beain bad bei-riti namar ka iaid pyrshah ia ki rule. Ka rule kala kren shai ba ia ka supplementary expenditure dei ban wanrah hadien bala mynjur ia ka mang tyngka. Kumno ki shim ia kum kane ka rai ban kynthup ia ka supplementary demand ha ka mang tyngka ba pura?”.

“Ban ong ba ha ka por ba ngi wanrah ia ka vote of account ha u bnai Lber, ka EC kam don jingtip ia ki jingbym biang, ka long kaei kaei ka bym lah ban pdiang. Kumno phi lah ban wanrah ia ka vote of account khlem da leh homework bha. Kane ka pyni ia ka jingbym lah bad jingbym ler treikam jong kane ka EC ba mynta” ula ong.

Hadien ka jingiatai kaba khluit bha, u Chairman ula ong “Nab aka EC kala pynshai, nga sngew ba dei ban shah ia ka mang tyngka ban wanrah hapoh ka Iingdorbar” haba kyntu ruh ia kito kiba wanrah ia ka mang tyngka ban ieng bad ai ia ka hukum.
Kum ka dak ka jingpyrshah, ki dkhot ka Liang Iatei kila iamih lut na Iingdorbar haba iengskhem ha ka nongrimba kim lah satia ban iadon bynta ha ka jingwanrah ia ka mang tyngka, kaba long bei-riti bad be-ain.

Haba iakren bad ki nongthoh khubor hadien ba mih na Iingdorbar, u Bah Titos ula ong ba ha ka budget book kaba kynthup ia ki sub head bapher bapher ba tyrwa ia ka mang tyngka u snem 2025-26. Ha ka GrantNo 1 jong ka GAD, kyndit ba paw ka sub head-“supplementary expenditure 2024-25”, kaba long haduh T.1.88 klur. Kumjuh ruh ha ka Grant No 6 ba iadei bad ka Legislative, la paw ka sub head-supplementary expenditure 2024-25”

Kane ka mut ba artylli ki supplementary expenditure u snem 2024-25 kala paw ha ka budget book.

“Kaei kaba pynkyndit ia ngi ka long ba kumno ka supplementary expenditure ka paw ha ka budget book. Nga la ieng ban pyrshah da kaba ong ba ka rule 111 kala kren shai “ba kino kino ki supplementary expenditure ne supplementary demand dei ban wanrah hapoh ka Iing hadien bala dep mynjur ia ka mang tyngka” ong u Bah Titos haba bynrap “Ha ka jingshisha, ka supplementary demand u snem 2024-25 kala dep kut naba la dep pyndonkam ruh ia ka pisa. Ka kamram jong ka EC ka long ban peit ia u snem 2025-26. Ha u Lber, ka EC kala wanrah ia ka vote of account bad ha kane ka vote of account, kila dep kynthup bad mynta ruh kila kynthup lang ia ka supplementary expenditure ba iadei bad ka tulop jong ki nongtrei ha ka mang tyngka ba pura. Haba phi la dep pynskhem ia ka vote of account, kumno kan lah ban long ba phi kynthup biang ha ka mang tyngka ba pura?’.

Haba ther tyngeh ia ka VPP namar ka jingkynnoh bym ler treikam, u Bah Titos ula ong ba kane ka EC ba mynta hapoh ka jingialam u Chief Executive Member Shemborlang Rynjah ka dei ka bym pat lah ban synshar bad pyniaid ia ki kam jong ka KHADC.

“U EM ula sei ia ki daw ba um don jingtip ha ka por ba wanrah bad mynjur ia ka vote of account. Hato ngi lah ban pdiang ia kane? Phi dei u EM, phi dei ka EC, phi lah mo ban shu ai ia kum kane ka jubab hapoh ka Iingdorbar. Kane hi ka pyni ba kim pat lah bad kim pat long ban synshar ia ka KHADC” ula ong.

“U Chairman hadien ba sngap ia ki nia jong ngi, u hap ban pynwai shipor ia ka Dorbar. Ka dei ka sien ba nyngkong ha ka histori ka KHADC lane ha Assembly ba hap ban pynwai ia ka Dorbar hashwa ban wanrah ia ka mang tyngka. Kane ka pyni shai ba kim pat lah ban pyniaid ia ka KHADC” ula ong.

“Ka rule 111 kala khang shai bha ba ka EC kam lah ban wanrah ia ka supplementary demand ha ka mang tyngka ba pura. Namar ba ka mang tyngka ka long kaba bei-riti, kumta, ngi la pyrshah bad ngi la rai ban mih jyndat noh kum ka dak ka jingpyrshah namar ngim kwah ban iadon bynta lang ha kane ka kam ba long be-ain” ula ong haba bynrap “Ka (VPP) lehse ka lah ban don ia ki jingthmu ha lyndet hynrei wat pynkhein pat ia ki rule”.

Nalor kane, u Bah Titos ula ong ba ka supplementary demand ka dei halor ka tulop jong kito ki nongtrei, kiba la shah weng kam dang shen bad kane ka kam ka dang don hapoh ka jingbishar ka Iingkashari.

“Hynrei, ka mukotduma ha Iingkashari ba iadei bad ka jingshah wengkam ki nongtrei kam don jingiadei eiei ruh em bad ka mang tyngka. Ka shong ha ka jingstad jong ka EC ba kumno kan siew ia ka tulop ha ka jaka ban wanrah ia ka supplementary demand u snem 2024-25 ha ka mang tyngka ba pura, kaba dei jong u snem mang tyngka 2025-26” ula ong.

Kat kum ka jingong jong u, ka EC kala leh ia ka kam ba long bei-riti bad beain namar ka sheptieng ia ka mukotduma ha Iingkashari ba iaid pyrshah ia ka Council hadien ka hukum ban wengkam ia ki katto katne ngut ki nongtrei.