Shillong Nailur 01: Ka samla ka jylla Meghalaya Phoebe Dale Nongrum, kala thaw ia ka histori ha ka jingiakhun ia ka Dakshin Dare Cross Country Rally 2025, ban long ka kynthei kaba nyngkong eh jong ka jylla ban jop ha ki 3 tylli ki kyrdan ha katei ka jingiakob.
Haba iakhun ha ka Rally kaba 5 sngi, kaba la sdang na Bengaluru sha Andhra Pradesh bad wanphai biang sha Bengaluru, ka Phoebe kala pyni ia ka jingtbit ka jongka bad iaka jingdonsap ryngkat bad u Navigator ne u nongkdew lynti u Venu Kumar uba na Coimbatore, uba la rah 6 sien ia ka nam lahduh ha ka Two-Wheeler Rally Champion.
Ka jingialehkai bha jong ka Phoebe kala pynlong ia ka ba kan wan balai ha ka T1 Modified Car Category, ban rah ia ka nam lahduh ha ka Liang ki kynthei bad ha ka Overall Standing kala ioh ia ka kyrdan kaba 4 (Top 5 ki shah jied ban ieng ha ka rynsan).
Kane ka jingthaw histori ym tang ba kala nang pynskhem ia ka jaka jong ka Phoebe ha ka Indian Motorsport hynrei kala kynjoh ruh sha u mawmer na ka bynta ki nongniah kali kiba dei ki kynthei ha ka ri. Ka jingjop ka jongka kala pyni ia ka jingkiew bad ka jingiashimbynta ki kynthei ha ka Motorsports.
Haba iakren hadien katei ka jingiakob, ka Phoebe kala pynpaw ia ka jingsngewnguh ia u nongkdew lynti ne Navigator, ka kynhun ka jongka bad ia ki nongkyrshan ki jongka bad ong ba ka jingjop ka jongka kadei namar ka jingiatreilang kum ka kynhun bad ka jingdon jingshaniah namar ba kadei shaphang ka jingskhem jingmut kaba nalade hi.
Ka Meghalaya Motorsports Society kala ai khublei ia ka Phoebe Dale Nongrum bad ia u Venu Kumar halor ka jingjop ka jongki bad ka jingwanrah nam bad burom ia ki nongialehkai Motorsport ha ka thain bad ka ri baroh kawei.
