Tam ka Dr Mehtab da palat 4500 vote
Shillong, Naiwieng 23 : Ka Dr Mehtab Chandee A Sangma, kurim u Myntri Rangbah ka Jylla Conrad K Sangma, kala thaw histori da ka jingpynkyllem noh ia ka ktem jong ka Congress ha Gambegre bad jop ia ka elekshan da 4594 vote.
Kane ka jingtam vote kam dei kaba heh ha ka histori jong ka Jylla hynrei ka dei ka nombor kaba heh haba ianujor ia ka jingjop ka National People’s Party (NPP) ha ki snem bala leit noh. Ha ka elekshon MLA 2023, ka NPP kala wan shadien ha kane ka constituency kaba la jop da ka Congress bad wan ba-ar da ka All India Trinamool Congress.
U MP ka Congress na Tura Saleng A Sangma u dei u radbah ha kane ka constituency, uba la jop haduh lai tylli ki elekshon naduh ba la pynkha ia kane ka constituency shuwa ka elekshon 2013. Watla u Saleng ula jop MLA haduh 4 samoi hynrei ka sien long MLA ba nyngkong jong u ka dei na Dalamgiri constituency, kaba la wanrah lang noh sha ka Gambegre.
Hadien ba u jop ia ka elekshon2023, ula ieh noh ia ka kam MLA da ka jingjop ia ka elekshon MP-Lok Sabha na Tura kaba long haba sdang jong une u snem.
Ka Dr Mehtab Chandee kaba dang iakhun ha ka sien ba nyngkong eh ia ka elekshon, kala pynliem ia ka MDC ka GHADC Sadhiarani M Sangma jongka AITC kaba la shah rem haduh arsien na kane ka constituency. Ka dei ruh ka kurim u Zenith Sangma, Myntri barim ka Sorkar Jylla bad hep kynsi jong u Myntri Rangbah barim Dr Mukul Sangma uba bat mynta kum u Nongialam ka Liang Pyrshah.
Uwei pat u u dei u Bernard N Marak jong ka Bharatiya Janata Party (BJP), uba dei ruh u MDC ka Tura ha GHADC. Une ruh ula shah rem ha ka elekshon MLA 2023 na South Tura pyrshah ia u Conrad K Sangma bad ha kane ka elekshon, ula wan ba-ar.
U kyrtong ka Congress Jingjang M Marak uba dei u briew ba iajan bha bad u Saleng A Sangma, ula wan balai ha kane ka elekshon.
Ka Dr Mehtab Chandee kala ioh haduh 12678 vote, kaba dei ruh ka jingioh vote ba bun tam na ki kyrtong ba ju ioh ha ka elekshon na kane ka constituency. Ha u 2013, u Saleng ula ioh 7260 vote, ha u 2018 ula ioh 7291 vote bad 2023 ula ioh 11,252 vote.
Da kane ka jingjop, ka NPP kala nang pynskhem ia ka jingbun paid hapoh ka Iingdorbar Thaw Ain ka Jylla, kaba la don lypa ia ka jingbunpaid bala biang pura ban thaw Sorkar marwei. Kane ka jingjop kala kyntiew ia ka jingdon MLA sha ka 32 ngut ha ka Iingdorbar ba 60 ngut ki dkhot.
Final Result:
Dr Mehtab Chandee A Sangma (NPP) – 12,678
Sadhiarani M. Sangma (AITC) – 8084
Jingjang M Marak (Congress) – 7695
Bernard N Marak (BJP) – 710
Jerry A Sangma (Independent) – 706
Sengkrabirth M Marak (Independent) – 147
NOTA – 95
Total votes polled: 30,086
