‘Balei ym lah ban pynbiang ïa ki jingdonkam ka building haba la dep plie’
Nongstoiñ, Jymmang 9: Ka West Khasi Students Union (WKSU) sengkmie ka buh ïa u dak jingkylli hakhmat ka sorkar ba balei ym lah ban pynbiang lut ïa ki jingdonkam bad jingduna hapoh ka building ba dang shu dep plie, kaba dei ïa ka building ba thymmai jong ka skul Sib Singh Memorial Government Higher Secondary School Nongpyndeng, Nongstoiñ.
Lah ban pynkynmaw ba la plie ïa kane ka building naduh u Kyllalyngkot jong u snem ba la lah. Ia kane ka Iingskul ba thymmai ka Sib Singh Memorial Government Higher Secondary School, la plie da u Myntri Rangbah ka Jylla u Conrad Sangma.
“Katkum ka jingïoh jingtip, ka sorkar hadien ba la dep plie ïa katei ka building, kam shym la shimkhia ei ei shuh ban pynbiang lut ïa ki jingdonkam kum ka um, ka light, ki white board kaba katei ka building ka donkam, na ka bynta ki khynnah pule jong katei ka skul bah jong ka sorkar ha ka thaiñ” ong u President ka seng samla D Sun.
“Naduh ba plie ïa katei ka jingtei, ym pat ïohi ba ki khynnah pule kin ïoh pyndonkam haduh mynta. Kane ka pynpaw ïa ka jingiehnoh shrah iehnoh beiñ bym kheiñ snep jong ka Sorkar.
Kumba ka paw, ki kam baroh ki pyni tang ïa ki jingpyrshang pynbiej suda ha ka rukom synshar ka khaddar hapoh ka thaiñ West Khasi Hills”, ula bynrap.
Ka WKSU ka ong “Lada ka sorkar ka don jingthmu shisha ban kyntiew ia ka pule ka dangle, ka dei ban shimkhia mar mar bad pyni sha ka pyrthei ba la lah ban pyndonkam ia kane ka Iingskul lem kumta kan dei tang ka kam thok kam shukor”.
Kala pynpaw b aka seng kan sa buddien thop ia kane ka kam bad lada jia ba ka Sorkar kam shimkhïa kyrkieh, ka seng kan pyni da ka kam na ka bynta ki jingmyntoi jong ki samla bad ki khynnah pule.
Shuh shuh, ka seng kala pynpaw ruh halor ka jingbym don nonghikai uwei ha ka Science Subject, lai ngut ha ka Arts. Kane ka long ka jingduh nong ki khynnah pule ha ka Secondary Level bad wat ha ka Higher Secondary.
