Thalain tyngeh ka JNC ia u President ka VPP ba pynjah ia ki ‘Jaintia’ na ka jingiatai Reservation Policy

Wat pyndonkam ia ka Jaidbynriew jong ngi ban iohnong sain pyrthei : Maham ka JNC

Shillong, Rymphang 27 : Ka Jaintia National Council (JNC) kalapynrem jur ia u President ka Voice of the People Party (VPP) bad MLA ka Nongkrem Ardent M Basaiawmoit namar ka jingpynjah ia ka kyntien “Jaintia” haba kdew bad iatai halor ka State Reservation Policy, bad ong ba ka dei ka jingleh “khlem pyrkhat, khlem jingkitkhlieh bad ba don jingthmu sain pyrthei ha lyndet”.

Ha ka kyrwoh ba pynmih ha ka sngi Thohdieng, u General Secretary ka JNC bah Wanshwa Suting ula ong ba ka jingkren u Bah Ardent ka dei kaba la leh khnang ban pyndam/pynjah ia ka Jaidbynriew Jaintia, watla kala ioh ia ka jingithuh da ka riti synshar ka ri kum ka Jaidbynriew Riewlum ka Jylla.

“Mano ba ai ia me ia ka bor ban pyndam ia ngi?” buh jingkylli ka JNC ha ka kyrwoh.

Ka JNC kala kdew ia ka histori ki Hima jong ki Syiem Jaintia bad ka jingthaw ia ka Meghalaya ha u snem 1972, kaba la pynkha ia ka Jaintia Hills District bad ka JHADC, kum ka jingithuh ia ka jinglong kyrpang jong ka Jaidbynriew.

Halor ka jingong u Bah Ardent ba ula pynpaw khnang tang ia ka kyntien “Khasi” ha ka jingiatai ia ka Reservation Policy ban wanrah ia ka jingiatylli kum ka Jaidbynriew, ka JNC kala ong “Ngim shym iapait iapra ne iakhlad satia. Ka jingiatylli jong ngi kam dei ka project sain hima sima, ka dei ka jinglong kyrpang jong ngi, ka snam jong ngi bad ka jutang jong ki kpa tynmen jong ngi” ong ka kyrwoh.

Ka JNC kala ai ka jingkyrshan ia u Symbud Myntri Rangbah Bah Sniawbhalang Dharuba la kyntait ban pdiang ia ki jing kren une u Nongialam ka VPP haba pynskhem ba ka “Khasi-Jaintia” ka dei ka jingkdew kaba iapdiang.

“Wat ju pyndonakm ia ka Jaidbynriew jong ngi ban myntoi sainpyrthei” maham ka JNC, haba kyntu ia ki MLA ba kin iada ia ka jingmyntoi jong ki paid Jaintia.