Shillong, Iaiong 08 : U kyrtong ka Regional Democratic Alliance (RDA) Bah Robertjune Kharjahrin ha ka sngi Nyngkong, ula thalain tyngeh ia ka Liang Pyrshah Voice of the People Party (VPP) namar ka jingpyrshang ban phiah ia ki paidbah ka Ri-lum Khasi bad Jaintia da kaba ai jait Kpa bad Jait Kmie.
“Tang namar ba ki (VPP) la leh bakla da kaba shim ia ka Jait Kpa, ki long kiba khreh ban phiah ia ka Jaidbynriew ha ki ar bynta-kawei ka Jaidbynriew ba ai jait Kmie bad kawei ka Jaidbynriew ba shim jait Kpa” ong u Bah Robertjune haba kren ha ka rynran ialap elekshon ba long ha Iawmusiang, Jowai, West Jaintia Hills.
“Kine ki dei ki juh ki briew, kiba tang ban kput ia ka khnai, ki long kiba la khreh ban thang ia baroh kawei ka Iing” ula ong.
Haba thalain ia u President ka VPP Bah Ardent M Basaiawmoit namar ka jingkop ia baroh, u Bah Robertjune ula pynkynmaw ia u Bah Ardent ba kumno ula pheil halor ka ishu MUDA.
“Lada phaidien biang, ki briew kin tip ba une u rangbah na Nongkrem ula pynkhihwin ha Secretariat halor ka ishu MUDA hynrei tang mar syn mih na Secretariat, ula kylla nongrim halor kane ka ishu” ula ong haba pyntip ba u Bah Ardent ula pynkut noh ia ka jingiakhih khlem da lah pynbeit ia ka ishu MUDA, kaba la ktah jur ia ki paidbah ka thain ha ka por ba synshar ka Sorkar Congress hapoh ka Jylla.
“Ka dei tang ha ka por jong ka EC ka KHADC ba ialam da ka UDP hapoh ka jingialam u Bah Titosstarwell Chyne kum u CEM bad Bah Paul Lyngdoh kum u EM, ia kane ka ishu (jingkyntur pud ka MUDA sha ki jaka ka Sixth Schedule) la lah ban pynbeit” ula ong haba bynrap “Ynda ngi la leit ban pynbeit ia ka ishu MUDA, u bah Paul u khlem rah maw/rah dieng hynrei ula rah tang ia ki file bad ka riti synshar ka Ri bad ka Town and Country Planning Act. Ka Sorkar ka khlem wanrah ia ki Pulit hynrei u AG ban iakren bad pynbeit ia ki kynrum kynram ka MUDA. Kine ki dei ki rangbah ba shisha, kiba la lah ban leh eiei halor ka ishu ba ktah ia ka Jaidbynriew”.
Haba pynpaw ba ka don ka jingiapher kaba khraw bha hapdeng ki briew kiba shu heh tyngam bad ki briew kiba lah ban iatai bad iakren ia ki ishu ba ktah ia ka Jylla, u Bah Robertjune ula ong “Ta ka daw ngim donkam ban iasaid bad ki briew kim donkam ban jied ia ki briew kiba nang tang ban iania namar ki donkam ban vote ia u briew uba lah ban iatai bad iasyllok ha kaban pynbeit ia ki jingeh u paidbah”.
Haba kyrpad ia ki briew ba kin kyrshan ia ka RDA, ka kynhun synrop jong ki artylli ki seng sain pyrthei barim tam ha Jylla-ka UDP bad HSPDP, u Bah Robertjune ula ong ba ka mishon jong kane ka kynhun synrop ka long ban iada ia ki briew, ia ka riti ka dustur, ka ktien ka thylliej bad ka hok halor ka khyndew ka shyiap.
 la leh bakla da kaba shim ia ka Jait Kpa, ki long kiba khreh ban phiah ia ka Jaidbynriew ha ki ar bynta-kawei ka Jaidbynriew ba ai jait Kmie bad kawei ka Jaidbynriew ba shim jait Kpa” ong u Bah Robertjune haba kren ha ka rynran ialap elekshon ba long ha Iawmusiang, Jowai, West Jaintia Hills.){kind=link}