Shillong, Rymphang 09 : Ka Iingkashari Meghalaya High Court kala shim ia ka jingshem jong ka 36th Interim report ka Justice BP Katakey Committee kum ka kam ba pynsngewsih, haba maham ba yn thung ia ka jingtohkit ba laitluid ne ki Central Agency ban pynngat ia kito kiba donkti ha kaban pynsaphriang ia ka jingtih dewiong beain ha Meghalaya.
Ka Iingkashari kala bthah ia u Deputy Commissioner ka East Jaintia Hills Manish Kumar bad Superintendent of Police Vikash Kumar ba kin aiti ia ka kaiphod ba bniah hapoh 10 sngi haba iadei bad ki sienjam bala shim pyrshah ia ka jingtih dewiong beain, kynthup ki jingkurup, ka jingkem, bad ki sienjam ban pynduhjait ia ka jingtih dewiong thliewkhnai ha Mynsngat-Thangsko hadien ka jingbthei bomb, kaba la shim ia ka mynsiem ki 27 ngut ki nongbylla bad pynmynmaw ia 9 ngut ha ka 5 tarik Rymphang.
“Ka kaiphod ba long ba man mynta haba iadei bad ki sienjam bala shim hadien ka jingbthei bomb ha Thangsko lah buh hakhmat kane ka Iingkashari, bad kaei kaba la pynpaw ka dei ka jingduna ki briew, nalor ki sienjam bala shim ban register ia ka case bad kem ia arngut ki briew” ong ka hukum bala pynmih da ka Division Bench ba khlieh da u Justice HS Thangkhiew bad Justice W Diengdoh ha ka sngi Nyngkong (9 Rymphang).
“Kane ka Iingkashari ia mynta kan nym pat pynmih ia kano kano ka hukum ba bniah hynrei ka pan ia ka kaiphod ba bniah hapoh ka 10 sngi kaba batai ia ki sienjam bala shim hapoh ka district baroh kawei haba iadei bad ki jaka ba don ki par tih dewiong beain, ka jingkurup ia ki tiar tih dewiong beain bad jingkem ia ki briew kiba donkti ha ka jingtih dewiong thliew khnai, khamtam ha Mynsngat-Thangsko. Yn sa nang pynmih ia ki hukum ba iadei bad ka jingsiew ia ka bailutksan, hadien ba ioh pdiang ia ka kaiphod” kala bynrap.
Lah bthah ia ki bor Sorkar ba kin kynthup ia ki jingtip ba bniah jong ka jingtohkit halor ka jingjia ba 14 tarik Kyllalyngkot ha Thangsko, ha kaba uwei u nongbylla na Assam ula iap, ha ka kaiphod jong ki.
U Justice BP Katakey ula aiti ia ka 36th Interim report sha ka Iingkashari, uba la leit ruh ban jngoh ia ka par ba bthei bomb ha Mynsngat-Thangsko nalor ki dur ki dar bad ki jingtip bala ioh haba iadei bad ka jingiap ki briew ha kane ka jingjia.
Ka kaiphod ka pynpaw ia ka jingtih dewiong beain bala saphriang ha kylleng ki jaka kum ha ka Shnong Mopala bad Sakhain, wat hapdeng ki hukum ka Iingkashari.
“Ka kaiphod ka pynsngewsih bha bad ka pyni ia ka jingbym shimkhia ki bor khmih ia ki kam ba la bynshet ha ki” ong ka Iingkashari.
Kala maham ruh “Ka Iingkashari ka kren shai ba kan sa tynrong ia ka jingkitkhlieh, bad lada donkam, kan sa nang pynmih ia ki hukum ban thung ia ka jingtohkit kaba thikna, da ki kynhun ba laitluid lane ki central agency”.
Ka Iingkashari kala bthah ruh ia u Deputy Commissoner bad u Superintendent of Police ba ki dang dei ban wan mih hakhmat ka kashari ha ka sien shongbishar ban wan la 19 tarik Rymphang.
