Shillong, Rymphang 18 : Ka Kyrtong ka TMC na North Shillong Elgiva Rynjah, hynne ka sngi saitjain, kala ther tyngeh ia u Myntri kam Pohiing bad Nongialam ka BJP Amit Shah halor ka jingkynnoh ba ka Meghalaya ka dei ka Jylla ba jur eh ka bamsap.
Haba thalain ia ka BJP halor kane ka jingkynnoh ba don da ka jingthmu na lyndet, ka kong Elgiva kala ong “Hadien ka jingialong paralok lang ha ka kam bamsap ha kine ki san snem, mynta baka elekshon kala wan, ka BJP kala kyndit bynriew sha ka kam bamsap bad jyrsieh ha ka Sorkar MDA. Balei ba ka BJP kam leh eiei ha kine ki san snem haba ki paralok ha ka MDA ki dang lute ia ka Jylla? Shaei kita ki Central Investigative Agency kiba bunkam tang ha ki Jylla ba synshar ki Liang Pyrshah?”.
“Ka BJP kam shym la leh eiei ha kine ki san snem namar ka don bynta lang ha ki kam bamsap. Kila die ia ka hok jong ngi bad ka Jylla katba ka pisa na ka Jylla jong ngi kala leit sha ka pla jong ki Nongialam ha Delhi, Assam bad Gujarat. Hynrei mynta b aka elekshon kala wan hakhmat, ka BJP kala shim ia ka lynti ban kynther ia kane ka kam bamsap” kala ong.
Haba khein ia ka BJP kum ka Party ba bamsap tam, kane ka kyrtong ka TMC kala ong “Ka BJP ka dei ka party ba don ia ka mynsiem ban wanrah ia ka jingsngew iapher Jaidbynriew hapoh ka Ri baroh kawei . Ki paidbah kim dei kiba bamsap hynrei ka BJP kala pynlong ia ki Nongialam jong ka Jylla jongngi ba kin bamsap. Lada u Amit Shah u nud shisha, ai ba un phah ia ka ED ba kan khynra ia ki Politician kiba don bynta lang ha ka sorkar MDA”.
