Shillong, Risaw 06 : Ka Iingkashari Meghalaya High Court ha ka sngi Palei, kala thalain ia ka National Highway Authority of India (NHAI) namar ka jingbym lah ban pyndep iala ka kamram kaba lam sha ka jingsniew bad khohruh khohram ka surok National Highway-6.
Hadien ba khmih ia ki dur kaba pyni ia ka jingjot rathai jong ka surok NH-6 ba dap da ki thliew ki syar, ka Iingkashari ba kynthup ia u Chief Justice Sanjib Banerjee bad Justice B Bhattacharjee kala ong “Kane ka dei ka bym lah ban pdiang ha ka Ri kaba la shai bad ka dei ka jinglehrain ba ka Iingkashari kan hap ban pynkynmaw kat ia ka NHAI ba kaei ka kam ba ka dei ban trei bad kiei ki jingkitkhlieh ba ka don”.
“Kumba ka long, ka jinglong jingman ki jaka ha Jylla ka long kaba eh ban iakren bad ki jaka sha kyndong kynshrot ki shu ap ia ka jingwan ki mar ki mata kiba kongsan. Ka jingpynpoi ia ki mar ka thut noh da ka jingsniew palat ki surok khamtam ia ka jinglong ka surok ha ki bynta ka Jowai-Ratacherra jong ka NH-6” kala ong haba bynrap “La kyrmen ba ka jingmaramot kan dep noh khnang ba kane ka bynta jong ka surok kan long ban iaid kali noh hapoh une u bnai ban wan”.
Ka Iingkashari kala ong “Ym dei ban ailad satia iaki surok ne Highway ha ka Ri ba kin poi haduh une u pud kumba long ka surok NH-6 na Jowai sha Ratacherra”.
Ka Iingkashari kala bthah ruh ba nalor ka jingai khubor ka NHAI halor ki kam ba kala pyntrei bad pyndep, u Deputy Commissioner ka East Jaintia Hills u dei ban file ia ka kaiphod jong u ban pyntip ia ka jinglong jingman kumba ka long jong ka ka surok NH-6 na Jowai sha Ratacherra.
Ka Iingkashari kala bthah ruh ba ka Sorkar Jylla ka dei ban pyndep noh ia ka jingmaramot ia ka surok Jowai By-ass hapoh ka saw taiew ban wan namar ba ka lyiur kala sdang ban kut.
Ka NHAI kala pyntip ruh ha ka kaiphod ba kala dep buh da uwei u contractor naduh ka 29 tarik Nailur 2023 ban maramor ia ka surok na Sonapur (km 141+500) sha Ratacherra (k m 171.455).
Ka kaiphod kala pynpaw ruh ba u contractor bala don lypa, un hap ban maramot ia ka surok na Jowai (k m 69.20) haduh ha Sonapur (k m 141.50).
