Shillong, Lber 31 : Ka Hynniewtrep National Youth Front (HNYF) ha ka sngi U Blei, kala thalain tyngeh ia ka Coordination and Welfare Committee (CWC) namar ka jingpynman kam iapher jaidbynriew halor ka jingshah pyniap ki arngut ki bar jylla ha Ichamati.
Ha ka kyrwoh, u President ka HNYF Bah Sadon Blah ula ong “Katba ki Pulit ki dang tohkit ia kane ka jingjia, kumno ka Coordination and Welfare Committee kala shu kdew kti beit da kaba pyniasnoh ia ka KSU bad ka jingpyniap ia u Esan Singh bad Sujit Dutta”.
“Kane kum ka HNYF ngi sngew b aka dei ka jingpyrshang jong ki ban wanrah ia ka jingia kynad pher jaidbynriew bad jing huri hura kaba ngin ym ailad satia” ula bynrap.
Nalor kata, u Bah Sadon ula ther tyngeh ruh ia ka Meghalaya Linguistic Minority Forum (MLMF) namar ka jingai umphniang ia ka ding da kaba pynbna paidbah ban pynlong ia ka jingiashong kyllain mungor halor ka jingshah pyniap kine ki arngut, kaba ha ryngkat bad ka CWC kila shim ia ka bynta ban wanrah ia ka jingiakynad jaidbynriew na ki kam bymman kiba shu jia ryngkhat
“Kumta, ka HNYF ka pyrshah jur ia kano kano ka jingpyrshang jong kum kine ki kynhun ban aiding ia ka jingiakynad jaidbynriew hapoh ka Jylla da kaba leh ia ki kam sngew iapher Jaidbynriew ki bym donkam satia, ia kiba ka Jaidbynriew Khasi kala iai long kaba jai jai pyrshah ia ka jingshah pyniap ki briew jong ngi la ka dei ha khappud, sha siat iap ha ki BSF ne ka jingshah bomiap u (L) Lurshai Hynniewta” ula ong.
“Ka jingthmu ban pynlong ia ka jingiashong kyllain mungor paidbah da ka Meghalaya Linguistic Forum ka dei ka jingkob pyllein pyllein ym tang ia ka HNYF hynrei ia ki paid riewlum trai Jylla ka Jylla. Kumta, ngi la rai ban pynlong ia ka jingiakhih ha ka 7 tarik Iaiong, 2024 pyrshah ia ka jingkynnoh ba ngi ki paid riewlum ka Jylla ngi dei ki nongpyniap ia ki bar jylla” ong u Bah Sadon.
