Thalain ka HNLC ia ka hukum ka KHADC ba knieh pyniaid ia ki jaka jngohkai ha Sohra

Shillong, Nohprah 15 : Ka kynhun kiengatiar Hynniewtrep National Liberation Council (HNLC) kala kyntait war ban pdiang ia ki jingbthah bala pynmih da ka Khasi Hills Autonomous District Council (KHADC) ba synshar da ka Voice of the People Party (VPP) haba iadei bad ka jingpyniaid ia ki katto katne ki jaka jngohkai bad ki jaka ba marjan kiba ju hap hapoh ka Sohra Syiemship.

“Katba ka KHADC ka dang pyrshang ban pynksan ia ki kam ba ka leh halor ka nongrim ba kan ai jingiada ia ka pisa u paid bah ban ban pynneh ia ka shongsuk shongsain katba dang sahteng ban pynbeit ia ka jingiakajia pud, ka jingmut bad ka jingpyntrei ia ka hukum ka pyni ia ka jingpyrshang kaba khlem ka jingbakla, ban pynskhem ia ka jingsynshar marwei halor ki jaka kibym pat lah ban pynbeit ia ka jingiakajia” ong u General Secretary ka HNLC Bah Sainkupar Nongtraw ha ka kyrwoh.

“Ka jingsahteng ban pynbeit ia ka jingiakajia pud kam dei kaba ai bor ia kino kino ki tnad treikam ba kin shimti halade ban pyniaid. Ka lynti kaba shong sain bad ba dei hok ka long ban pynneh ia kine ki jaka kumba ki long ne status quo khlem da pyniapher” ong u Bah Sainkupar.

Ka HNLC kala kynnoh ia ka KHADC ba ka pyrshang ban ban pyni ia ka bor jong ka bad pyntroin ia ki bor treikam ki trai ri trai muluk (Shnong/Raid/Hima) haba bynrap ba ka jingthung ia u nongpdiang (receiver) bad ka jingpynsangeh ia ka jing pyniaid hi ki bor synshar tynrai ka dei ka “jingleh kai sain pyrthei, ym ka jingiada da ki bor treikam ka Council”.

“Ka jingpyniaid bala pynjari khlem ka jingbit, ka jingiamir jingmut lane ka jingshim rai ba khatduh kam long kaba shonghok bad kan nang wanrah shuh shuh ia ka jingbym shaniah bad ka jingialeh pyrshah” maham ka HNLC haba dawa ia ka KHADC ba kan pyrkhat biang ia ki sienjam ba kala shim bad ban pynlong ia ka jingiamir jingmut kaba khlem shah liang.

Ka HNLC ka la pynpaw biang ba ki paidbah ka Sohra kim pyrshah ia ka jingpynbeit ryntih, ka jinglong khuid, ne ka jingkitkhlieh, hynrei ki pyrshah ia ka jingpyntroin ia ka bor synshar riti lyngba ki rai ba shim marwei khlem ka jingiasyllok.