Guwahati, Nohprah 06 : Ka Congress ha Assam kala pynrem jur ia ka rai jong ka Sorkar BJP ha Assam ba khang ban bam doh masi ha baroh kawei ka Jylla bad kynnoh ba u Myntri Rangbah ka Jylla Himanta Biswa Sarma bad ka BJP kila jam palat ia u pud kaba ktah ia ka hok laitluid ba shimet bad ka dustur jong ki nongshongshnong.
U President ka Congress Bhupen Borah ula ong ba ka Congress Party ka ju ieng skhem ha ka nongrim ka jingialong kumjuh, jinglaitluid bad burom ia ka dustur jong baroh kumba la pruid dak ha ka riti synshar ka Ri. Ula pynrem ia ka sienjam jong ka Sorkar namar ka jingpyrrkhing ia ka mon shimet ki briew.
“Ka Sorkar kam dei ban hukum da kaba bor ia kaei kaba ki briew ki dei ban bam, ban phong lane kumno ba kin leh iala ka jong ka jingleh tynrai. Baroh ki nongshongshnong ki don ia ka hok tynrai bala pynkupbor da ka Riti Synshar ka Ri ban shim ia ka rai shimet shimet” ong u Borah.
U Borah ula pynrem jur ia ka BJP bad RSS kiba la pyndonkam ia ka jingmane ia ka Masi kum ka atiar sain pyrthei ban pynbor ia ka jingngeit jong ki sha kiwei pat. Haba burom ia ka jinglong kongsan ka masi ha ka niam Hindu, ula ong “Ka BJP bad RSS ki lah ban kren halor ka Gau Mata, hynrei ka dei kaba bakla ban pynbor ia kiwei ba kin bud ia ka rukom leh jong ki”.
Haba kyntait ia ka jingkop u Himanta uba ai jingmut ba lada ki Nongialam ka Congress kila sangeh ban bam doh masi, ka BJP kan sa le lang kumjuh, u Borah ula ong “Hato la khmih lynti ia nga ban rai kaei kaba u Himanta Bisaw Sarma u bam, u phong bad kumno u rakhe ia ka Bihu? Ka jinglong nongialam ka dei ia ka synshar khadar, ym ban pyniaid ia ka jingim jong kiwei”.
Ha ka 4 tarik Nohprah, u Himanta ula pynbna ban khang noh ia ka jingbam doh masi bad ai doh masi ha ki jaka paidbah. “Naduh mynta, ia ka doh masi ym dei ban ai shuh ha kino kino ki restaurant, hotel lane ki jaka ialum paidbah” ula ong.
