Shillong Nohprah 19: Ka Shnong Moolamylliang, East Jaintia Hills, kala thaba shriak da ki light bala pynriam (decorate) ha ki dur bapher bapher ha baroh kawei ka Shnong, ban pynkhreh ia ka jingrakhe Khristmas.
Ia kane ka jingpynriam dur da ki light la sdang ban pynmeh naduh hynnin ka janmiet sngi Nyngkong bad la khnoin ia u budam bording da u MP ka Rajya Sabha Dr WR Kharlukhi ha ka jingiadonlang ka MLA ka Sutnga-Saipung Kong Santa Mary Shylla bad kiwei kiwei.
Kane ka jingpynthaba light ia ka Shnong kaba sdang naduh ka por 5 baje janmiet haduh 12 baje shiteng miet kan neh haduh ka 3 tarik u Kyllalyngkot 2024.
“Na ka jingdum sha ka jingshai” ka dei ka khubor jong kawei ka Shnong ka Ri-lum Khasi Jaintia ban rakhe ia ka Khristmas ha ka rukom kaba pher bad ba shongkun bha bad kane ka Shnong ka dei ruh kaba la pawnam ha ka liang ka jingpynkhreh pynkhrum ia kane ka Sngi ka jingwan long briew u Jisu Khrist, da ka jingiamih ryntih bad ialong kawei hapdeng ki Nongshongshnong khlem da khein niam ne kiei kiei baroh.
Kane ka Shnong ka dei ka shnong Moolamylliang kaba don ha East Jaintia Hills District, kaba jngai kumba 112 Km na Shillong bad 15 Km na Khliehriat, Headquarter ka East Jaintia Hills.
Kane ka Shnong ka dei ruh kaba la pawnam kum kawei na ki shnong kaba khuid tam ha Ri-lum Jaintia bad ka shnong kaba la plan bha ha ka rukom pynlong Shnong, khamtam eh ka jingieid ia ka mariang kaba la paw na ka jingiashimbynta ki nongshongshnong ban pynneh ia ka jingjyrngam ka Shnong da kaba thung ia ki dieng ha shilynter ka shnong naduh ki lynti iaid kjat, ki surok iaid kali bad ki jaka ba lait.
 ha ki dur bapher bapher ha baroh kawei ka Shnong, ban pynkhreh ia ka jingrakhe Khristmas.){kind=link}