Nongpoh, Nohprah 17: Ka Ri Bhoi District Christmas Committee kaba ju shim jingkitkhlieh kumno ban pynphuh pynphieng ïa ka sor Nongpoh da ki jingthang jingshai bapher bapher bad ruh ban thaw ia ka Shyngoid ba kha ia u Jisu Khrist, ban pynkynmaw ruh ïaki nongleit nongwan ba ka jingwan long briew u khun jong u Blei u Jisu Krist ka la jan, kane ka kynhun kaba la lamkhmat da u Bah Donald Rymbai, ka la ioh ban sdang ia ka jingrakhe Pre Christmas bad plie paidbah ia ka Shyngoid ha ka janmiet jong ka 16 tarik u Nohprah.
Ha kane ka janmiet ki Nongkitkam jong katei ka kynhun ka la ïoh ban pynkhreh ruh ïa ka shyngoid kaba la pynthiah ïa khyllung Jisu ha ka rukom kaba iphuh iphieng.
Ia kane ka shyngoid la plie paidbah da u bah Mayral Born Syiem MLA ka Nongpoh ha ka jing ïa don lang u Bah Sylvestar Mynsong Rangbah Shnong Nongpoh, Bah Opel Lyngdoh Rangbah Shnong Mawroh, Anthony Suchiang Secretary shnong Nongpoh lem bad kiwei kiwei ki riew rangbah.
Haba kren ha katei ka janmiet u Bah Mayral Born Syiem u la ai ka jingïaroh ïa u Bah Donald Rymbai nongialam ka Christmas Committee u bym shem la kynran dien ban pyn iphuh iphieng ïa ka sor Nongpoh na kawei ka snem sha kawei pat ban pynphuh pynphieng ia ka sor Nongpoh da kaba thaw ïa kane ka shyngoid ha katei ka jaka.
Haba sam ia ka khubor jong ka Khristmas u Bah Mayral Born Syiem, u la ong ba to ai ba kane ka christmas kan dei kyrpang na ka bynta kito kiba don hapdeng ka jingduk jing jynjar kiba pang kiba shitom bad kiwei kiwei, da kaba kyntu ruh ba ha ka jingrakhe ïa ka Khristmas kam dei ban long da kaba lehkmen da kaba bam ba dih ïa ki jingsniew hynrei dei ban pynkhreh bha ïalade shimet shimet bad ban kylli ruh ba kaei nga dei ban leh ha kane ka Khristmas.
