Nongstoin, Naitung 27 : Ka jingkieng ha ka shnong Mawkaton kaba pyniasoh ia ka surok na Nongkasen sah Umlipoi, kala kdiah bad khyllem na ka daw ka jingkit palat pud jong ka trok.
Kane ka jingjia kala jia ha ka janmiet sngi Balang bad ha kane ka jingjia, kawei ka trok kala noh da ka tdong shapoh ka wah.
U Superintendent of Police ka West Khasi Hills, ula pyntip ba namar kane ka jingkdiah ka jingkieng, la pyntip ba la khang shuwa mynta shipor ia ka surok na Nongkasen sha Umlipoi haba bthah ba kino kino ki kali kiba kwah leit sha Mawkaton ne na Mawkaton sha kiwei kiwei ki jaka ba kin pyndonkam noh da kawei ka surok ba iaid lyngba ka shnong Kynroh.
Ka seng Hynniewtrep Youth Council Lai Lyngdoh Circle bad ka Mawkaton Unit, kala leit ban iakynduh ia ki bor pyniaid District ka West Khasi Hills ba kyntu ban shimkhia kloi kloi halor ka jingdkut kane ka jingjia.
Kane ka seng kala ong ba ka daw ka jingdkut ka jingkieng ka dei namar ka jingkit palat pud jong ki trok kiba iaid lyngba kane ka surok ki ba leh bym suidniew ia ki jingbthah ka seng naduh kine ki snem bala leit noh.
