Shillong, Jymmang 10 : Ki Pulit kila ioh tam iaka metiap bym lah ban ithuh na kawei ka par dewong bala iehshrah bad dap um, ha East Jaintia Hills District ha ka sngi U Blei.
Ia kane ka metiap la ioh tam da ka jingiatreilang jong ka State Disaster Response Force bad ki Pulit ka District.
Ia kane ka metiap la lap nyngkong ha ka sngi Thohdieng kaba don haoh kane ka par, ha ka shnong Moonlait Bri Sumer.
U Rangbah Shnong ula pyntip ia kane ka jingjia sha ki Pulit, kiba la leit ban tohkit bad pynthikna ia ka jingdon kane ka met kaba la ngam hapoh ka um.
“Hynrei ia ka met ym shym la lah ban sei ha ka sngi Saitjain namar ka jingjylliew jong ka par” ong u Superintendent of Police Pankaj Rasgania uba la pyntip ba ka kynun ai jingiarap kala leit biang ha ka step sngi U Blei bad la ioh pat ban sei ia ka met ha ka por 11 baje mynstep.
U pyntip ba ia kane ka met ym pat shym la lah ban pynithuh. Ka jingtohkit ki Pulit mynta ka dang iaid shakhmat ban tih ia ki daw tynrai ka jingiap.
