Nongstoin, Rymphang 05 : Ki Pulit ka Nongstoin, West Khasi Hills, kila ioh ban tam ia artylli ki metiap jong ki rangbah briew, kiba la suba jur ba ki shah pyniap klep ha ki riew runar ha artylli ki jaka kiba dang hapoh ka jingkhmih ka Thanad.
Ki Pulit ki iathuh ba ha ka janmiet sngi saitjain, kila lap ia kawei ka metiap kaba la thiah lyngktar ha nala ha ka Shnong Mawrangtangwein, kaba don marjan ka Ophis u DTO bad jong ka surok Nongstoin-Wahkaji.
Ki Pulit kila lap ba ia ka met bad ka khlieh jong une u briew la tep da ka ktieh jong ki mar katba ki kjat pat kila paw shabar. Ki Pulit kila sei ia ka met bad la lah ban ithuh ba ka dei ka met jong ka Bah Yespar Pariong ba 54 snem, uba dei na Nongstoin.
Ia kane ka met la pynithuh da ki bahaiing kiba pyntip ba u Bah Yespar ula jah na iing naduh ka 27 tarik Kyllalyngkot bad u dei ruh uba kyrni ha ka jingdih kyiad. Ki Pulit kila rah noh ia ka met sha Civil Hospital, Nongstoin ban pyndep ia ka post mortem bad ka jingtohkit mynta kala iaid shakhmat.
Kumjuh ruh ki Pulit ka Nongstoin kila ioh tam ia kawei ka metiap jong u briew bala ithuh kum u Donbokstarklin Syiem Shangoi kaba la thiah lyngktar ha surok NH-44-E ha Jaidohkroh bad ha ka jingtohkit la lap ba ka khlieh bad ki bynta jong ka dur ka dar, ka shynrong khlieh kila mong bad pait.
Ha ka jingtohkit la shem ba une u briew ula iap na ka jingshah tied na khlieh da ki kynja dieng, ia uba la shem na kane hi ka jaka bad la shem ruh ba une u dieng u khia kumba 15-20 kg.
Ki Pulit kila kit noh ia ka metiap sha Civil Hospital Nongstoin ban pyndep ia ka post mortem bad ha ka jingtohkit, kila ioh ban kem ia uwei u briew ba suba donkti, uba dei na Nongspung.
Ki Pulit kila register case halor kane ka jingjia bad ka jingtohkit mynta kala iaid shakhmat.
