Nongstoin, Nailar 04 : Ki 5 tylli ki Shnong jong ka thain Langdongdai, West Khasi Hills, kila takrain tyngeh ia u Symbud Myntri Rangbah ba khmih iaka Tnad PWD (Roads) Bah Prestone Tynsong halor ka jingkhein sting jong u Contractor ban shna pyndep ia ka surok ba tang 2 kilometer shiteng na Mawdiang sha Mawkyllon.
Kine ki Shnong ki kynthup ia ka Mawkyllon, Langdongdai, Mawsmai, Mawguru bad Langsaw kiba la pyntip ba une u Contractor ula shu ieh ia kane ka surok mynta la hynniew snem khlem da trei pyndep satia ha ka jingsiang maw bad siang rong tang namar ka jingkynnoh ba u don ka jingiadei ba iajan bad u Symbud Myntri Rangbah ka Jylla.
“Tang namar ba u Contractor u don jingiadei ba iajam bad u DyCM ula shu ieh ia ka surok la hynniew snem khlem da pyndep ban siang maw bad siangrong na Mawdiang sha Mawkyllon” ong u Bah Birbor Riangtem, Secretary ka Hima Nonglang Sirdarship.
Kat kum ka jingong jong u, kane ka jingkhein sting jong u contractor kala pynsohsat ia ka jingim jong ki paidbah ka thain Langdongdai baroh kawei khamtam ia kiba pang ba shitom khlem da iakren ia ka leit ka wan, namar ka jingngam bad jingktieh palat jong ka surok haduh ba ki kali four wheel ruh kila syllang ban iaid.
“Kum u Nongialam ka Hima, ngam lah ban shu sngap bad shu peit ia ka jingeh ki khun ki raiot ka Hima” ula ong haba iathuh ba bunsien ki rangbah ka thain kila leit ban ujor ia kane ka kam sha ki Heh Ophisar ka Tnad PWD hynrei haduh mynta kane ka jingud jingnam kala poi sha ki skhor kiba kyllut.
Ula pyntip ba ki paidbah ka thain kila kyntu ia ki Nongialam ka Hima bad ki Nongsynshar Shnong ba kin khot noh da ka jingialang paidbah ban iapyrkhat halor kane ka surok bad ka jingkhein sting u contractor na ka bynta ban shim ia ka rai halor ka sienjam ba dei ban shim.
