Shillong, Naitung 16 : U MLA ka South Shillong Bah Sanbor Shullai, ula synniang haduh T. 1 lak sha i Meirad Kmoin Wahlang, kum ka jing kyrshan ia ka jingleit iashimbynta jong I ha ka jingiakop mareh marathon ka ban long ha Australia.
U Bah Sanbor ula iakynduh ia i meirad Kmoin Wahlang bala 76 snem ka rta, hynne ka sngi Ba-ar ban pynkup burom ia I hashuwa ba in leit iashimbynta ha kane ka lympung iakop mareh ka pyrthei.
Nalor kane ka song pisa, u Bah Sanbor ula ai sngewbha ruh ia ka song pisa ba T. 30,000 sha u Coach Bah Benningstar Lyngkhoi kum ka jing sngewnguh ha ka jingpyrshang jong u ban wanrah nam ia ka Jylla.
I Meirad Kmoin Wahlang, in dei I dkhot ka kynhun ialehkai ka Ri India sha ka lympung ialehkai 13th Pan Pacific Master Games, 2024, ka ban long ha Gold Coast, Australia ha u bnai Naiwieng.
I Meirad Kmoin i dei iba ju leit iashimbynta ha ki jingiakop mareh marathon ha kylleng ki jaka ym tang ha Meghalaya hynrei shabar ka Jylla ruh ba kynthup ha Mumbai, Kolkata, Guwahati bad kiwei kiwei.
Lah ban kdew, ka Sorkar Jylla kala ai ka jingkular ban pynlut ia baroh ki jingdonkam i Meirad Kmoin Wahlang ha kane ka jingleit iashimbynta ha ka lympung iakop mareh ha Australia.
I Meirad Kmoin Wahlang in mih ban leit sha Australia ha ka 29 tarik u Risaw.
