Syllang ki nongiaid lynti ha surok Nongstoin-Shillong namar ki jingiakop khwai dohkha

Nongstoiñ, Nailar 16: Ka jingrakhe їa ka sngi laitluid jong ka ri India ha ka 15 tarik, ka la long pynban ka sngi kaba jynjar tam їa ki nongleit nongwan na ka surok National Highway 44 (E) na Nongstoiñ sha Shillong, namar ka jingbun jong ki pung kiba ki trai ki pynlong jingїakop khwai dohkha ryngkat ka jingpynkhalai nusib ki don harud ka surok bah.

U babu Witting Mawsor MLA barim ka Mawshynrut u la ong ba ha katei ka sngi, u la mih na  Nongstoiñ naduh ka por shibaje nohphai sngi ban leit shim dawai na Shillong. Hynrei naduh Pamphyrnai haduh Langtor la don ka jingpynїakop khwai dohkha ha man la ki jaka, kat haduh ba ka jingsahkut ki kali kiba kit їa ki nongleit nongwan ka neh da ki bun bun kynta.

U la ong ruh ba ha katei ka sngi ka jingthmu jong u ka long ban leit shim dawai na Shillong bad ban wan phai noh ynda la їoh dawai namar ki bun ki kam. Hynrei tang na ka daw jong ka jingdheng kali ha man la ki jaka ba pynlong їakop khwai, ka la shim por haduh phra kynta tam bad ha ka jaka ba un їoh dawai ha katei ka juh ka sngi, u la hap ban sah miet noh ha Shillong bad shim dawai pat ha ka sngi kaba bud.

Halor ane, u bah Mawsor u la ong ba balei ka sorkar ka ai jingbit pathar khlem da peit bniah bad khlem da phaidien їa ki jingjia kiba la jia ha u snem ba la dep, ha kaba wat ki kali kit nongpang ki la sah kut haduh ba ka la don ka jingkhlad noh ki mynsiem kordor hapoh kali tang namar ka jingsahkut da ki bun kynta ha surok namar ka jingїakop khwai dohkha ha ka pung kaba don harud surok.

Utei u Nongmihkhmat barim ka Mawshynrut u la ong ruh ba um pyrshah satia ia ka jingїakop khwai dohkha lada ki nongpynїakop khwai ha ki pung kiba don harud surok, ki lah ban pynbiang їa ki jaka їeng kali kham pajih na ka surok bah ban ym pynthut їa ki kali kiba leit ba wan.

U la ong ruh ba ki bor pynїaid district ki dei ban da bishar bniah ba kim dei ban ai jingbit ban pyniakop khwai dohkha ha bun tylli ki pung kiba don harud surok ha kajuh ka sngi.