Shillong, Lber 17 : Palat 1028 ki iing na ki 147 tylli ki shnong ka ri-Bhoi District, kila shah pynjulor ha ka jingsyllad ka eriong bad u lapbah ha ka miet 16 tarik Lber hapoh ka District.
Palat 5000 ngut ki briew kila shah ktah na kane ka jinglynshop ka bor ka mariang ha kane ka district, kaba la pynjulor naphang lin ia kiba don ha lynti iaid jong ka, naduh ki iing ki sem, ki jingri jingdup bad ki jingthung jingtep.
Haba pyntip ia kane, u Deputy Commissioner ka Ri-Bhoi Abhilash Baranwal ula pyntip ba ka jingpynjulor kane ka eriong bad u lapbah kala jia ha baroh ki C&RD Block ka District bad kaba kham shah ktah jur eh ka dei ki shnong kiba hap hapoh ka Umling bad Jirang Block.
U iathuh ba kat kum ka kaiphod bala ioh lum na baroh ki Block kat haduh hynne ka janmiet, ka jingjulor jong ki iing ki sem kala kot sha ka 1028 tylli ha kaba bun kila mad ia ka jingjulor naba shah rong ka tnum. U iathuh ba kumba 5000 ngut ki briew kila shah ktah bad ka jingkhein ka dang lah ban kiew namar ka jingbym pat ioh lut ia ka kaiphod.
Hynrei u iathuh ba ha kine ki jingjia baroh, ym shym la don kano kano ka jingmynsaw ne ka jingjia ba sngewsih.
Namar kane ka eriong, kala wanrah ruh ia ka jingthut ha ka jingsam bording ha ka district na ka daw ka jingthut jong u 132KV line ha Umiam, Byrnihat bad 33 KV ha Nongpoh.
U Deputy Commissioner u pyntip ba ka Ophis jong u, kala leit ban sam ia ki mar rashon/mar bam, ki jainkup syaid, ki tarpal bad kiwei kiwei ki jingiarap ba kyrkieh sha kine ki longiing kiba shah ktah.
Ula kyntu ruh ruh ia ki paidbah ba kin iahusiar bha ha kum kane ka por ba dang kylla ka jinglong jingman ka suinbneng.
