Naduh 2023 lah poi ka pisa ba T.200.81 klur dang ap ia T.89 klur
Shillong, Naitung 04: Ka tnad Public Works Department (PWD) ka Jylla, kala pyntip ba ka National Highway Authorty of India (NHAI) kala ioh pdiang ia ka song pisa ba T.200.81 klur na ka Ministry of Road Transport & Highways (MoRTH) ka Sorkar India naduh ka 17 tarik Risaw 2023 ban maramit ia ka surok National Highway-06 na Jowai sha Ratacharra.
Ka pyntip ruh ba ka NHAI kala phah biang ia ka jingtyrwa ba T.89.90 klur sha ka MoRTH ban ker kynroh bad pynmadan bha ia ka surok ha ki 7 tylli ki jaka kiba jur ka jingtwa khyndew ha East Jaintia Hills kynthup ha Sonapur Tunnel.
Kane ka long kum ka jingpynshai na u Secretary ka Tnad PWD (Roads & Bridges) ka Jylla halor ka jingmih khubor ba kam ba ka Meghalaya kala ioh ia ka song pisa ba T.290 klur na ka MoRTH ban maramot ia ka surok NH-06, kaba long tang shisngi hadien ka jingleit ai dorkhas u MP ka VPP na Shillong Dr Ricky AJ Syngkon sha u Myntri ka MoRTH Nitin Gadkari.
U Secretary ka PWD ula pynshai ba ka NHAI kala mynjur bad tyrwa ban shna pynkhlain bad pynbha ia ka surok NH-06 hapdeng ka Jowai-Ratacherra ha ka jinglut jingsep ba kot T.200.81 klur ha ka 17 tarik Risaw, 2023. Ia kane ka jingmynjur la pyntip lyngba ka shithi No E-811162 ba 1 tarik Naiwieng, 2023.
Ula pynshai ba ia ka kam la pyntrei ha ki artylli ki song bad ia ka tender jong ka song-I na ka bynta ban pynkhlain/pynbha kynthup ka jingmaramot naduh ka 69.200 Km sha ka 120.200 Km la mynjur bad la ai ruh ia ka Letter of Acceptance lyngba ka shithi No.25941 ha ka 07 tarik Rymphang 2024.
“Ia ka soskular contract la iasoi ha ka 8 tarik Lber 2024 na ka bynta ka kam ba T.77.81 klur bad ka jingpyntrei ia ka kam kala sdang naduh ka 23 tarik Lber 2024” ula pyntip.
Une u Heh Ophisar ula pyntip ba ia ka song-II ban pynkhlain/pynbha ia ka surok kynthup ka jingmaramot man ka por ia ka bynta hapdeng ka 120.200 km sha ka 171.455 Km la mynjur bad ia ka Letter of Acceptance No 25914 la pynmih ha ka 2 tarik Rymphang, 2024. Ka song contract ka dei kaba T.122.99 klur bad ia ka soskular contract la iasoi ha ka 22 tarik Rymphang, 2024 bad ka kam ruh kala sdang naduh ka 22 tarik Lber 2024.
Ka pyrthei ka shaiong ruh bad kam lah ban mutdur ba kumno tang da ka dorkhas u MP, ka Sorkar India kan burom bad pyllait ia ka song pisa, khlem da khmih ia ka Detailed Project Report ne kaba ki ong ka DPR, khleh da khmih ia ka jingleh sorjamin, khlem da khmih ia ki jingkhein jingdiah. Kumno ruh ka Ministry kan tip tang na ka dorkhas une u MP ba ka Jylla ka donkam T.290 klur ban maramot ia ka surok.
Haba phai sha ki jaka jong ka surok NH-06 kiba jur ka jingma na ka jingtwa khyndew, u Secretary ka PWD u pyntip b aka NHAI kala jied ia ka M/s THDCIL kum ka consultant ban pynkreh ia ka Detailed Project Report (DPR) ban ker kynroh bad pynduna ia ka jinglong ki riat ha ki hynniew tylli ki jaka kiba don jingma bha kynthup ia ka thain Sonapur Tunnel.
U pyntip ba ka NHAI kala iasoi ia ka MoU bad ka M/sTHDCIL ha ka 15 tarik Rymphang 2024 ban pynkhreh ia ka DPR kaba kot haduh T.89.90 klur bad ia kane ka DPR la dep phah sha ka Regional Office ka NHAI, Guwahati ha ka 18/06/2024 na ka bynta ban leh ia ka tender.
U pyntip ba ka NHAI ka dang ap ban ioh ia kane ka song pisa bad u Myntri Rangbah ka Jylla Conrad K Sangma ha ka 24 tarik Jylliew, ula leit iakynduh ia u Nitin Gadkari ban buddien ia kane ka kam.
