Nongstoin, Nailur 08 : Ki riew kiengatiar ki ba lah tap durkhmat, la suba ba kila leit syntiat haduh arsien arwat ia ka Iingsah u Syiem ka Hima Nobosohphoh, West Khasi Hills, kaba la antad ba ka lah ban dei ka jingthwet bad mut sniew ia u Syiem jong ka Hima.
Une u Syiem ka Hima Nobosohphoh u dei uba kyrteng u Pa’iem Kawangbor Syiemiong.
Ki kur ki kha kynthup ka Iing ka sem bad ki hynmen ki para jong u Syiem kila pynpaw ia ka jingsngewkhia kaba jur haba ioh jingtip ia kane ka jingwan syntiat jong kine ki riewtapkhmat bad ba kieng suloi, ia ka iingsah u Syiem.
U Bah S Nongdkhar uba dei u nongaiktien ka Iing u Syiem ha ka jingiadonlang u Bah S Syiemiong hynmen u Pa’iem Kawangbor bad u Bah P Nongdkhar kynum jong u Pa’iem bad kiwei kiwei, kila iathuh ba ka jingsyntiat nyngkong kala jia ha ka 26 tarik u Nailar 2024 bad la pyntip ba ki don arngut ki briew kiba lah kah durkhmat bad kieng suloi, kila wan ban ieng hajan ka Iingsah u Syiem.
La ong ba ka sien kaba ar kala jia ha ka 3 tarik u Nailur bad ha kane ks ngi ruh ki don arngut ki briew bala kah durkhmat, ia kaba la suba jur ba ki lah ban dei ki juh ki briew.
Ki bahaiing ki pyntip ba ha ka 3 tarik Nailur, kine ki briew kila wan ha ka por 5 baje janmiet eiei bad uwei u samla Shnong ruh ula iohi ia kitei ki briew hynrei tang khyndiat por, kine ki briew kila phet noh bak sha khlaw.
Namar kitei ki jingjia, ki Kur ki Kha jong u Syiem Kawangbor, kila lum ia ka jingialang hynne ka sngi ban iapyrkhat sani bad iathir jingmut ia kaei kaba dei ban leh.
Ki bahaiing kila khot ia kine ki briew ba tap durkhmat ba kin wan shakhmat ban iakren ha ka miej jingiakren bad ki lada kim lah ban iasngewthuh jingmut shuh bad u Syiem.
Kila pynpaw ba ka Iing ka long kaba kloi ban shim ia ka jingkitkhlieh ban iakren sngewthuh bad ki ym ban shu wan syntiat pyntieng bad pynrit mynsiem ia baroh.
Halor kitei ki jingwan syntiat, u Pa’iem Kawangbor Syiemiong, ula leit buh da ka ejahar ha Nongstoin Police Station.
