Nongpoh, Jymmang 12 : Ki Pulit ki pyntip ba uwei u Rangbah ula iap na ka jingsuba shah shoh ha ka kynhun ki runar hynnin ka miet ha ka shnong Erpakon, Ri-Bhoi District.
Une u Rangbah u kyrteng u Bah Kyrmen Lyngdoh Nonglait ba 38 snem ka rta, uba shong bas ah ha ka shnong Erpakon.
Ki Pulit ki iathuh ba ha ka por kumba 8 baje haduh 8:30 eiei, ki nongshongshnong ka Erpakon kila lap ia une u rangbah uba la thiah lyngktar ha lynti shnong ha ryngkat ka jingphlei snam na ki bynta ka skhor. Ki pyntip ba mar mar la pynkit ia une u rangbah sha Civil Hospital ban ai jingsumar hynrei une u rangbah ula khlad noh hadien.
U Rangbah Shnong Bah Micheal Thongni bad Secretary Shnong Bah Lambor Kharshilot, kila pynpaw ia ka jingsngewkhia halor kane ka jingjia bad pyntip ba ia une u briew la pynkit sha Civil Hospital Nongpoh hynrei ula khlad noh mar iapoi ha hospital.
Ki pyntip ba ka Civil Hospital kala phah kit noh ia ka met jong une u rangbah sha NEIGRIHMS ban leh ia ka post-mortem.
Na ka liang ki bahaiing kila pynpaw ia ka jingsuba ba don ki runar kiba leh ia katei ka kam bad kila leit ban ujor da ka ejahar ha Nongpoh Police Station ba kin tohkit bad wad ia kiba donkti.
Ki Pulit kila register case halor kane ka ejahar bad ka jingtohkit mynta kala iiad shakhmat.
