Nongstoin, Rymphang 16: Ki Masi jong ka kynhun ri jingri kaba la tip kum Nongrwe Diary Co operative Society Ltd, Nonglwai II Nongstoiñ West Khasi Hills District, la suba ba kila shah pyniap dusmon ha ki riew runar.
Katkum ka khubor ba la ioh lum, kumba hynriew tylli ki Masi kila shah pyniap ha ki riew dusmon kiba la shu ai da ka bih kaba khlaiñ bha, hadien ba la lap ïa u bilor Chemical u ba la tip kyrteng Formaldehyde Solution na ka jaka ba ri masi.
Kitei ki Masi ki dei kiba la ai da ka East Khasi Hills Milk Union Co operative Society Ltd jong ka Meghalaya Milk Mission lyngba ka sorkar India hapoh ka ‘Umbrella scheme Rashtriya Pashudhan Vikas Yojna’. Kitei ki hynriew tylli ki Masi kiba la ïap ki kynthup ïa lai tylli ki masi khem dud bad lai tylli ki masi khun.
Na ka liang u Melansius Tympuiñ bad u Tynshainlin Kharbani kiba dei ki nongsumar ïa kitei ki masi, ki la ong ba kum katei ka jingjia kala jia teng naduh u bnai Risaw 2022 bad ha u Kyllalyngkot 2023. Ki la nang pyrkhat ba ki dei kiba ïoh kem jingpang bad la khot teng ruh ïa u Doktor ba un wan jngoh, ha kaba u Doktor ruh u la ong ba kum kane ka rukom jia bad ka rukom pang kam pat ju jia mynno mynno.
Ki la ong ba mynta u bnai ha ka miet jong ka 14 tarik u Rymphang 2023 ha ka por 12 baje ei ei shiteng synñia, la ïoh sngew ïa ka jingwan prong jong ki briew ïa ka sem Masi. Hynrei haba leit ban khmih, ym shym lah ban ithuh ïa kita ki briew, namar ki la phet noh bak, da kaba shim kabu ïa ka jingdum jong ka miet.
Ki la iathuh ba ki la shu ïohi tang ka jingthaba jong ka torch light bad ha ka step jong ka 15 tarik pat, ki la shem ïa uwei Formaldehyde Solution kaba la pynsuba ba la ai da katei ka bih ban pynïap ïa ki Masi.
La ong shuh shuh ba baroh kitei ki Masi kiba la ïap, kila prie bad kim bam jingbam shuh, nangta ki kjat bad ki khoh siew ki jngem snam. Haba la pyrshang puid ïa kawei ka Masi ba pun khun shuwa ban tep, la shem pynban ba u masi khun u ba don ha kpoh u la dep pyut.
Na ka liang u bah Bah Zacheus Tympuiñ Chairman ka Society, ula pyntip ba un sa leit ban buh da ka jingujor sha ka tnad ba dei khmih ïa katei ka jingjia.
