Nongpoh, Naiwieng 05: Uwei u rangbah ba la 33 snem ka rta naka shnong Shiliangumdoh, Mawhati la suba ba u la pynkut noh ia la ka jingim da kaba noh iap na jrong ka Jingkieng ha Umiam kaba don hajan ka Fire Service, Umiam hynne ka step sngi Balang.
Une u Rangbah u dei uba la tip kyrteng kum u Bah Aiboklang Mynsong na ka Shnong Shiliangumdoh, kaba don ha ka thain Mawhati.
Kat kum ka khubor Pulit, la ong ba une u Rangbah u la pynkut noh ia la ka jingim namar ka jingsngew sohsat ka jingim bala ban palat ka jingpang ha ka met. La ong ba dang shen u dang shu mih na hospital.
Kiba haing hasem ki la pyrshang ban ia wad ia u ha kylleng ki jaka ha ka thain Mawhati hadien ba une u rangbah u la phet na la ïing, hynrei dei hynne ka step la ioh jingtip ba la lap ia ka met ha khrum ka jingkieng ka pung Umiam.
Ia kane ka met la aiti noh sha ki bahaiing hasem ba kin pyndep ia ka jinglehniam lehrukom kaba khatduh.
