Bthah ia u DGP ka Assam ban pynthikna ia ka jingshngain ki Nongai mukotduma
Shillong, Naitung 06 : Ka Iingkashari Meghalaya High Court, kala suba jur ba dei ki briew na Assam kiba pyniaid ia ki kam tih dewiong be-ain bad seng karkhana coke ba be-ain ha Jylla Meghalaya.
Kane ka jingsuba kala mih hadien ba u Nongai mukotduma Shailendra Kumar Sharma ula aiti ha ka affidavit ba file ha ka 5 tarik Naitung, ia ka thup kyrteng bad phone nombor jong baroh ki briew kiba u ong baki dei ki ‘Kingpin’ ba donkam ban seng karkhana coke be-ain bad tih dewiong be-ain ha Jylla Meghalaya.
Ka Iingkashari haba shong bishar ia kane ka mukotduma hynne ka sngi, kala iathuh ruh ba u Nongai mukotduma ula shah byrngem byrsit ha kine ki ‘Kingpin’ haba bthah ia u Director General of Police ka Assam (DGP) ba un pynthikna ia ka jing shngain bad ka jingiada ia u nongai mukotduma, ki bahaiing hasem bad ki nongiasaid ain jong u namar kane ka jingshah byrngem.
Kat kum ka jingong ka Iingkashari, kum kine ki kam beain la i kumba ki dei kiba pyniaid da ki briew na Assam.
U Shailendra Kumar Sharma ula aiti ia ka jingujor hapoh ka Basistha Police Station, Guwahati ha ka 30 tarik Jylliew, ba don uwei u briew ba kyrteng u Balwant Bhama, u ‘Kingpin” ha ka jingpyniaid beain ia ki karkhana coke ha Meghalaya, ula phone ia u haduh arsien ha ka step 30 tarik Jylliew bad wan ruh marmet sha ka Iingsah ha kane ka step ban byrngem byrsit ia u nongmudui lada u dang iai bteng ia ka jingiakhun mukotduma.
U Advocate General ruh ula kdew ia ka kaiphod ba 3 tarik Naitung bala file da u Director General of Police (DGP) ka Jylla Meghalaya kaba ong “Ba ha ka jingtohkit, uwei na ki ba shah kynnoh, u Youdishthra Bhaman, uba dei u trai jong ka M/S Kalyani Fuel Limited, Shallang, ula shah kem ha ka 15 tarik Jylliew 2023, namar ka jingialeh pyrshah bad ka jingtohkit haba shim statement na u kat kum ka kyndon 161 CrPC ha ka por ba u wan mih sha thanad halor ka notice bala phah sha u kat kum ka kyndon 41 A CrPC. Une u briew ula don mynta hapoh ka Judicial custody”.
U Advocate General ula pyntip ba u Youdishthra Bhama u dei u Khun jong u Balwant Bhama, ia uba u nongmudui mukotduma ula ujor pyrshah.
Ha ka hukum, ka Full Bench bala khlieh da u Chief Justice Sanjib Banerjee kala ong “Namar kane, ka sakhi kala ieng ba u nongmudui u khlem jer ia ka kyrteng teng na sla bad ka lah ban don kaei kaei halor ka jingjer kyrteng ia ki kingpin lane katto katne na ki briew kiba donkti ha ka kam tih dewiong beain bad ban pyndonkam ia kine ki dewiong beain ha ki karkhana coke hapoh ka Jylla. Kane ka dawa ia kaban hap khmih bniah bha.
“ Ia ka mynta, namar ka jingshah byrngem byrsit u nongai mukotduma bad ruh ia kum kane ka jingkynnoh bala ujor da u nongai mukotduma ha ka PIL No.8 of 2022, namar une u nongai mukotduma u dei uba sah ha Assam, la kyrpad ia u Director General of Police, Assam ba un shim ia ki sienjam ba donkam lyngba ki Officer in-charge jong ka Police Station bad Superintendent of Police ka District ba kin pynthikna ia ka jingiada bad jingshngain ia u nongai mukotduma, ki bahaiing hasem bad ki nongsaid ain ba mihkhmat ia u nongai mukotduma” kala ong.
Ka Iingkashari kala bthah ruh ia u DGP ka Assam ba un khmih lang ia ka jingujor jong u nongai mukotduma ha ka 30 tarik Jylliew, bad pynthikna ba un shim ia ka sienjam ba dei ban shim kat kum ki lynti jong ka ain.
U Advocate General ba mihkhmat ia ka Meghalaya ruh ula pyntip ba ka Jylla kala dep phah ktien sha ki bor Pulit ka Assam ba kin shim ia ki sienjam pyrshah ia ki briew kiba don ha Assam, kiba lah ban donkti ha lyndet ka jingpyniaid beain ia ka kam tih dewiong bad ki karkhana coke ha Jylla Meghalaya.
Ha kajuh ka por, ka Iingkashari kala rai ba kan sa shim bishar lang noh bad ka PIL No 8 of 2022 kaba pynleit jingmut halor ka thymmei jong u dewiong bala pyndonkam da ki karkhana coke hapoh ka Jylla.
Ka Iingkashari ha ka 4 tarik Naitung kala pynmih ia ka hukum ba bthah ia ka Sorkar Jylla ban pynshai balei ba ka Iingkasahri kan dang shaniah ia ka jingtreikam ki bor treikam ka Sorkar kynthup ki Pulit bad balei ba ym donkam ia ka Central Bureau of Investigation ba kan tohkit ia ka jingtih dewiong beain bad jingpyndonkam ia une u dewiong ha ki karkhana coke naba la i kumba ia kine ki kam la pyniaid da ki briew na Assam.
Pule ruh: Kyntu ka TGAM ia ka KHADC ban pyrrkhing ia ka jingwan treikam ki Tour Guide nabar ka Jylla
