Shillong, Rymphang 05 : Katto katne ngut ki nongbylla tih par, la suba ba kila iap ha ka jingbthei bomb hapoh kawei ka par tih dewiong beain ha ka thain Thangsku, East Jaintia Hills.
“Ka kynhun jong ngi kala pynthikna ba kane ka jingjia kala jia hynne ka step, hynrei ngim pat lah pynthikna haduh katno ngut” ong u Superintendent of Police Vikash Kumar ha ka sngi Palei.
Hynrei ula ong ba uwei u briew ula mynsaw jur bad la pynkit ia u sha Shillong na Sutnga PHC.
Ki Pulit kila pan ia ka jingiarap jong ka State Disaster Responsee Force (SDRF) ba kin leit iarap wad briew ha kane ka par.
“Ka kynhun SDRF kan dang ban wan poi” bynrap u Kumar.
Kane ka jingbthei bomb la suba ba kala jia ha ka por ba tih dewiong beain ha kane ka par, ia kaba la ngeit ba ka dei ka jingleh beain.
“Hooid, ka i kumta hi” ong u Kumar haba kylli la kane ka par ka dei kaba beain.
Ki Pulit ki dang ap mynta ia ki jingtip ba bniah namar ka jingtohkit kan dang ban iaid shakhmat. “Kane ka dei ka kam kaba hap tohkit” ong u Kumar haba kyntait ban batai ia kaei ka daw ba jia kane ka jingjia.
