Shillong, Jylliew 13 : Ka Khun Hynniewtrep National Awakening Movement (KHNAM) hynne ka sngi Palei, kala dawa ban ai noh haduh 50% ka bhah na ka State Reservation Policy sha ki paid Khasi Jaintia namar ka jingbun paid lane shu khein kyllum lang noh ia ka 80% ka bhah na ka bynta ki Khasi Jaintia bad Garo.
Kane ka jingdawa ka KHNAM kala wan ha ka dur jong ka jingai jingmut bala aiti sha ka Expert Committee on State Reservation Policy, kaba la thung da ka Sorkar Jylla ban bishar thymmai ia ka Policy hapoh ka Jylla.
Ia kane ka jingai jingmut la aiti da u President ka KHNAM Bah Pyndapborthiaw Saibon ha u Bah LK Diengdoh, Secretary ka Expert Committee.
Kat kum ka jingai jingmut, ka KHNAM kala ong ba kat kum ka para 1 jong ka Policy, ia ka jingai bhah dei ban pynshong nongrim na ka jingdon paid (Population) jong ki paid riewlum trai shnong ka Jylla kata ki Khasi, Jaintia bad ki Garo.
Kala kdew ba kat kum ka khana samari 2011, ka jaidbynriew Khasi Jaintia kala don ia u paid bynriew uba tam haduh 5,78,918 ngut ia ki paid Garo bad kane ka jingiapher ka lah ban nang kiew sha ka 9,49,756 ngut haduh ba poi ka jinglum khana samari ban sa wan. Kumta, dei ban khein ia ka jingiapher ha ka jingdon paid haba khein ia ka percentage ban ai bhah na ka Reservation policy.
Namar ka jingsngewthuh ba kan sa mih ka kynrum kynram halor kane ka jingdawa, ka KHNAM kala ai jingmut ruh “Khnang ban nym mih ka jingiatakhuh hapdeng ki paid riewlum trai jylla, dei ban shu khein kyllum lang noh ia ka bhah ba 80% sha ki paid Khasi Jaintia bad Garo, ia kaba yn pynshong nongrim noh na ka jingwan shakhmat ne merit. Kane kan pynksan ia ka kyndon jong ka “Maintenance of Efficiency in the Adminsitration” kumba kdew ha ka para 1 jong ka Policy.
“Lane, ain oh ia ka bhah ba 50% sha ki paid Khasi bad Jaintia namar ka jingbun paid” ong ka KHNAM.
Ka KHNAM kala ai jingmut ruh ban pynkylla noh ia ka para 2 jong ka policy da kaba pom noh ia ka kyndon ban rah shakhmat ia ki kam kiba lait (ban rah sha u snem ban wan lada ym lah thungkam ha ki kam ba lait).
Ka KHNAM kala ong ba ka jingrah sha uwei u snem ia ki kam ba khlem lah thungbriew ka dei kaba iaid pyrshah ia ka jingthmu jong ka Policy.
Nalor kane, kala dawa ruh ban pynduh pyndam noh ia ka Office Memorandum (OM) ba 28 tarik Jymmang 1974, kaba shah ban thungkam iaki kam bala mang sha ki Garo ban thung da ki bym dei ki Garo ne ki briew ba nabar ka Jylla tang namar ki nang ban kren Garo ne tip ia ka riti ka dustur ki Garo. Kala ong ba kane ruh ka long pyrshah ia ka jingthmu jong ka Policy bad ka plie lad ia ka jingpyndonkam bakla ia ka policy da kiwei pat.
Ha kajuh ka por, ka KHNAM kala dawa ba dei ban pynkylla noh ia ka Office Memorandum ba 18 tarik Nohprah 1972 kaba kren halor ka bhah bala mang sha ki kam ba lait ha ki District (District level post), ha kaba ki nongiohkam kim lah satia ban shah pynkynriah kam shabar na ka District ba ki iohkam ha kaba la buh ia ka bhah kyllum lang ba 80% ia ki paid Khasi Jaintia bad Garo ha ka jaka ban phiah mar 40% ia ki paid Garo bad Khasi Jaintia.
Kat kum ka jingong ka KHNAM, kumba long mynta, ki District level post ha Ri-lum Garo ki dei kiba la pyndap tang da ki paid Garo suda katba ha Ri-lum Khasi bad Jaintia Hills pat, ki Garo kila shah thungkam ha ryngkat ki paid Khasi Jaintia.
Ka KHNAM kala dawa ruh ba ka State Reservation Policy 1972 ka dei ban treikam lang ia ki semi-government department, Corporation, Private sector, private establishment khnang ba kan bud ka lad iohkam iohjam sha ki samla trai jylla.
Haba kren halor ka jingpyntreikam ia ka State Reservation Policy ha ka jingsam bhah ha ka pule ka dangle, ka KHNAM kala ai jingmut ban wanrah lang noh ia ka kyndon thymmai khnang ban kren shai ba ka State Reservation Policy 1972 ka dei kaba la mang beit thik tang ha ka thungkam thungjam.
Halor kine kiei kiei, ka KHNAM kala ai jingmut ia ka Expert Committee ba kan pyndep noh kloi katba lah ia ka jingbishar thymmai ia ka Reservation Policy.
