Shillong, Jul 5: Ka Iasnohktilang Madanrting FC bad ka Umpling SC hynne ka sngi Balang kila jop ha ka sien kaba nyngkong ha ka Shillong Sports Association’s Women’s League kaba la long ha Third Ground, Polo.
Kane kadei ka sngi kaba ki kynhun ki bym pat la jop iaka jingiakhun, hynne ka sngi kila mad iaka jingjop kaba nyngkong eh da kaba ialehkai bha.
Ha ka jingiakhun kaba nyngkong ka Iasnohktilang kala pynliem da 2-0 iaka Kharang SC ha ka Group B, katba ka Umpling kala pynliem ia ka Mawkriah West SC da 1-0 ha ka Group A.
Ka Jerina M Mawlong kala thep ia ka kol ha ka minit kaba 51 bad ka Aitibha Thabah kala thep ia ka kol ha ka 56 minit na ka bynta ka Iasnohktilang bad hadien kane ka jingjop kane ka kynhun kala risa bad shad kmen ha ryngkat bad ka jingiashondur ban sah kynmaw.
Hadien kane ka Mawkriah West kala pynrem iaka Umpling da kaba ioh iaka penalty haka minit kaba 54 ha kaba ka Streamlet Taro khlem ka jingartatien kala thep ia ka kol.
Ka Mawkriah ha ki ar tylli ki jingiakhun kala shah thep haduh 32 kol, hynrei hynne ka sngi kala ialehkai bha ban tehlakam iaka Umpling ban ym ioh thep kol da ka jingiakhun dohiap.
Ha ka sngi Palei ka jingiakhun haka Group A kan long hapdeng ka PFR Football Academy pyrshah ia ka Kick Start Football Coaching Centre ha ka por 2:30 mynsngi bad hadien kane ka Laitkor SC kan iakhun pyrshah ia ka Lawei Smit SC ha ka por 4:15 mynsngi.
Pule lang ia kane: Byrngem ïakhih ka JAC-ARPV lada ym siew pyndep ïaka Pisa Election/COVID Duty
