Shillong, Naiwieng 02: Ka kynhun ialehkai ka Mawlai SC ka la lah ba kan pynliem ia ka Sawmer SC lyngba ka tie breaker da 5-4, ha ka lumpung ialehkai Super Cup ka Shillong Sports Association, ha ka janmiet sngi Saitjain, ha SSA Stadium Polo.
Ha kane ka jingiakhun, la shem bad iohi tyngkrein, ba ka kynhun ialehkai ka Sawmer, kam shim la shu ai suk ia ka Mawlai ba kan jop ia kane ka jingiakhun, pynban, ki rang ialehkai ki la mih madan da ka mynsiem ba kin iakhun takut tasam, kaba da shisha ka da rah ia ka rong ka rup jong kane kawei pat ka lympung ialehkai kaba sdang thymmai ia ka da ka SSA naduh mynta ka samoi ialehkai jong u snem.
Haba phai sha kane ka jingiakhun, dei ka kynhun ialehkai ka Samer ba ar-sien ar-wat ka la lah ba kan tam kylla shakhmat ia ka kynhun ialehkai jong ka Mawlai, ia kaba ka rai mano napdeng kine ki ar kynhun ban jam sha ka semifinal, la hap ban rai da ka tie breaker, hadien ba ka pali kaba la wan ban shut da u Orestar Sad, la lah ban kyrda ia ka da u rang ap kol ka Mawlai u Damanbha Rymbai, kaba hangne ka plie lad hi war ia ka kynhun ialehkai ka Mawlai ban jop ia kane ka jingiakhun bad jam sha ka semifinal.
Ka jingiathep kol hapdeng kine ki ar kynhun ka long shwa mar shi kol ha kaba kut ka kylla step, mar ar kol haduh ba kut ka 90 minit bad mar 3 kol ha kaba kut jong ka extra time.
U Bickyson Kharkongor (10′) bad Diego Khyriem (90’+2, 96′)ki long ki player ba la thep ia ki kol naka bynta ka Sawmer, katba u Robertson Khongriah (20′), Banraplang Pyngrope (53’) bad Mewan Rasmut (97′) ki la thep ia ki kol naka bynta ka kynhun ialehkai jong ka Mawlai.
Kumban shu pynkynmaw ba ha ka por ka jingiakhun ha ka SPL mynta ka samoi, dei ka Mawlai kaba la lah ban pynliem ia ka Sawmer da 6-2, kaba hynnin ka sngi, sa shisien, marsein ia sdang, ka jingiakhun, mihpaw ka jingiakhun kaba da dohiap bha na kine ki ar kynhun, katno tam lei lei na ka kynhun ialehkai ka Sawmer.
Hadien kane u Banman Roy Nongsiej ka Sawmer u la hap ban mih noh shabar ka madan iakhun hadien ba u la ioh pdiang ia ki artylli ki yellowcard, ia kaba kam Shim la don satia kano kano ka jingktah ia ka kynhun hi baroh kawei.
Ynda haba la rah ha ka tie breaker, na ka liang ka u bah Arki Mylliemulong u la rai ban bujli noh ia u nongap kol da kaba pynrung noh da u Jeffrey Jyrwa ha ka jaka jong u Edison, hynrei na ka liang ka Mawlai, ka bynshet beit ia kane ka kam ha u Damangbha, kaba busnein u la shu shong beit hapoh ka ben shong ha baroh ki bynta ka jingiakhun ka SPL, bad dei tad hynnin ka sngi ba u ioh ia ka kabu ban ap ia ka kol, ia kaba ula pyndonkam hok ia kane ka kabu kaba u ioh ban da kylla long u namtam hadien ka jinglah ka jong u ban kyrda ia kawei ka tie breaker ba la shut da u Orestar.
Ha kaba kut jong ka jingiakhun, u Banraplang lyngba ki ar kol kiba u la ioh ba un thep ha kane ka jingiakhun ka la biang pura ia u ban rah ia ka khusnam kaba long 5 hajar tyngka t7 Player of the match, ia kaba la sam ia ka da u President ka SSA bah Banteidor Lyngdoh.
Kumta ha kaba kut kane ka jingiakhun, ki khmat mynta kin ia phai pat sha ki artylli ki jingiakhun jong ka semifinal, ha kaba ka Rangdajied kan iakhun pyrshah ia ka Langsning FC, katba ka Shillong Lajong FC kan iakhun pyrshah ia ka Mawlai SC kiban long ha ka 7 bad ka 8 tarik mynta ka taiew ha ka por 5 baje janmiet.
