Shillong, Nohprah 09 : Ka SSA Champions Cup 2025 kala kot sha kawei pat ka kyrdan hynne ka miet hadien ba ka Nongkseh SS&CC kala pynliem ia ka Langsning da 4-3 kol lyngba ka tie breaker hadien ba ka extra time jong kane ka semifinal ba nyngkong kala kut da 2-2 kol, kawei na ki jingiakhun ba shongshit bha bala pynlong ha SSA Stadium la baroh katta ki snem.
Ka Nongkseh mynta ka dei ka kynhun ba nyngkong ban jam sha ka final jong ka Champions Cup bad kan iakynduh pat sa ia ka Shillong Lajong lane ka Meghalaya Police ban iaknieh ia ka nam lahduh. Ka Lajong bad ka MLP kin iakhun ha ka semifinal kaba ar lashai ka sngi ha ka por 4:30 baje janmiet.
Ban jop, ka Nongkseh haba nyngkong kan hap ban kyndit bynriew na ki jingshoh tyndep namar ka jing shah thep haduh 2 kol tang hapoh ka 17 minit. Ia kine ki kol la thep da u Donlad Diengdoh (3) bad Dajiedlang Wanshong (17).
Ka Langsning kam shym la lah ban kyrda ia ka jingialehkai dohiap jong ki rang ialehkai ka Nongkseh kiba la lah ban pynphai ia kine ki kol tang hapoh ka 30 minit. Ia kine ki kol ka Nongkseh la thep da u Kynsaibor Lhuid (21) bad Mebankhraw Wahlang (30).
Mar ar kol la iakhaid bad ka jingiakhun ha madan ka long kaba itynnad bad shongshit bha, ha kaba na ka por sha ka por kat shaba ka bol ka don, kam lah ban khlem da pynrah mynsiem ia ki paid nongwan kyrshan.
U Apborlang Kurbah ka Langsning FC u la hap ban mih noh shabar na ka madan iakhun hadien ba u la ioh pdiang ia ka yellow card kaba ar na kane ka jingiakhun.
Hadien ba ki ar kynhun kim shim la lah ban ia pynkhih ia ka jar, ban ioh ia ka rai mano napdeng kine ban jam sha ka phainal, la rah noh pat sha ka extra time, kaba hangne ruh ym shim la don shuh ba lah ban ia pynkhih ia ka jar, bad ha kaba kut ka rai kaba sah hi ka long ban rah sha ka tie breaker.
Ki arngut ki rang ap kol katta u Daraphun Talang ka Nongkseh bad Rajat Paul Lyngdoh ka Langsning, ki la lah ban ia kyrda (save) mar kawei ka ka penalty, hynrei dei tad ha ka jingiashut kaba khatduh, ba u uwei na ki rang ialehkai ka Langsning FC u la shut jam bha iaka bol kaba la dei beit dain ia ka dieng kol bad blait ka bol ruh kan mih shabar.
Ki player bad paidbah nongkyrshan ka Nongkseh SS&CC kim lah khlem da shad kmen, ba ka lynti iaid ka jong ki naduh ka First Division ter ter haduh kane ka lympung ka long da shisha kaban pynsah nam pateng la pakit.
Ha kaba kut jong ka jingiakhun u Kynsaibor u la ioh ba un rah ia ka nam Player of the Match ia kaba la aiti sha u da ka nongaibuit ia ka sorkar kong M. Ampareen Lyngdoh, MLA.
Hadien kane ka jingiakhun, ki khmat kin phai pat sha ka jingiakhun ia ka semifinal kaba ar lashai ka sngi hapdeng ka Shillong Lajong FC pyrshah ia ka MLP FT kaban sdang ha kapor 4:30 janmiet ha SSA Stadium.
