Shillong, Nailur 02: Ka Shillong Lajong kala kiew sha ka kyrdan ka Ba-ar jong ka Shillong Premier League 2025 da kaba pynrem da 2-0 ia ka Laitkor ha ka jingiakhun kaba la long hynne ka sngi Baar ha SSA Stadium, First Ground, Polo.
Mar ia sdang ka jingiakhun ha ka kylla step u Nongialehkai ka Laitkor u Freelyson Tariang ula ioh ia ar tylli ki kabu kiba biang bha hynrei ka bol ka leit dei ia u diengkol bad ha ka kabu ka baar, u Freelyson ula shut ia ka bol hynrei kam shym la rung satia shapoh kol.
Ka Shillong Lajong kala ialeh ban tur shakhmat bad kala ioh thep ia ka kol ha ka minit kaba 27 da u Deibormame Tongper uba la mih ban iakhun ha ka sien kaba nyngkong.
Ha ka kylla miet, u nongialehkai ka Laitkor u Richarles Rani ula shah beh noh na madan ialehkai da kaba ioh ia ka Red Card ha kaba ula pynur da ka lynti ka bym dei ia u nongialehkai ka Lajong hapoh ka Box jong u nongapkol ka Laitkor bad kumta ka Laitkor kala hap ban ialehkai noh sa tang 10 ngut ki nongialehkai haduh ban da kut.
Haba u nongialehkai ka Lajong u Iohborlang ula leit ban shut ia ka penalty, ym shim la lah ban thep ia ka kol namar ka jingioh ban iada da u nongapkol ka Laitkor u Deranius Wahlang.
Kane ka jingbym lah thep ka Lajong ia ka Penalty kala ai mynsiem pynban ia ki nongkyrshan ka Laitkor kiba la leit rung ban lehkmen ha madan ialehkai, hynrei kane ka jingkmen ka jongki kala neh tang katto katne por haba ka Lajong kala ioh thep ia ka kol ka baar lyngba u Emanbha Marbaniang ha ka 74 minit.
Ka Lajong mynta kala kamai 7 point bad don ha ka kyrdan ka baar hadien jong ka Nangkiew Irat kaba la ioh 9 point, katba ka Laitkor kadei napdeng ki 3 tylli ki kynhun kiba la ioh mar 3 point bad ka don mynta ha ka kyrdan kaba 6 namar ka jingiapher haka jingioh thep kol.
Ka jingiakhun ha ka sngi Balang kan long hapdeng ka Mylliem pyrshah ia ka Malki ha ka por 4:30 nohphai sngi.
