Shillong, Nailur 01: Ka Rangdajied United kala pynrem ia ka Nongrim Hills da 1-0 ha ka Shillong Premier League 2025 ha SSA Stadium, First Ground, Polo, hynne ka sngi Nyngkong.
Ka Rangdajied kala ioh khur ei ia ka jingjop lyngba ka jingbakla u nongialehkai ka Nongrim Hills u Shanborlang Thangkhiew ha ka 74 minit uba la pynrung ia ka bol sha la kol.
Ka jingiakhun hapdeng kine ki ar tylli ki kynhun kala long kaba itynnad bad kaba iakhaid ha kaba kila ioh ia ki kabu ban thep kol hynrei kim shym la lah satia bad ha ka kylla step ka jingiakhun kala kut ha ka jingiakhiad na ka jingbym don ba lah ban thep kol wata ka Rangdajied kala ioh bun tylli ki kabu ban thep kol.
Ha ka kylla miet ki nongialehkai ka Rangdajied bad ka Nongrim Hills kila bteng ban ialehkai bha bad kila ioh ia ki katto katne ki kabu hynrei kitei baroh kila sepei lut namar ka jingbym lah ban thep kol, hynrei dei ha ka minit kaba 74 ba ka Rangdajied kala ioh ia ka shi kol kaba la kum bakla pyndei da u nongialehkai ka Nongrim kaba la pynlong syndon ia ki ban khur ia ka 3 point. Hadien kane ka jingbakla ki nongialehkai ka Nongrim kila thaw ia ki lad ki lynti ban ioh pyniakhaid hynrei kim shym la lah satia haduh ban da kut noh ka por ialehkai.
Kane ka jingjop kala pynlong mynta ia ka RUFC kaba don ha ka kyrdan kaba 9 ban poi noh sha ka kyrdan kaba 5 da kaba kamai 4 point, katba ka Nongrim Hills kam shym la ioh ban kamai tang shi point ruh namar ba kala mad ia ka jingrem ha baroh 3 tylli ki jingiakhun.
Ha ka sngi Baar, ka jingiakhun kan long hapdeng ka Lajong pyrshah ia ka Laitkor ha ka por 4:30 nohphai sngi.
