Shillong, Risaw 09 : Namar ka jingther u slap, ka jingiakhun jong ka lympung ialehkai Shillong Premier League 2025 hapdeng ka Mawlai SC pyrshah ia ka Rangdajied United FC, ha SSA Stadium, First Ground, Polo, la hap ban pynsangeh noh.
U slap u ba la neh jan baroh shi sngi, u la pyndap hi smam da ka um ha baroh ki bynta jong kane ka madan, kaba pynlong ia ki nongpyniaid bad kumjuh ia ki artylli ki kynhun ba kin rai ban nym ialehkai shuh, da kaba pynshong nongrim ia ka bit ka biang jong ki player.
Ha ka jingshisha, kane kan dei ka jingiakhun ba nyngkong jong ka kylla ialehkai kaba 8 ha kane ka lympung, ha kaba ka kynhun ialehkai ka Mawlai, kaba don ha ka kyrdan kaba ar, ka la long kaba la pynkhreh bha naka bynta kane ka jingiakhun kaba la dei ba kan long hynne ka nohphai sngi, haba phai pat sha ka Rangdajied United FC, ka ruh ka phai bha la ki jong ki khmat ban iakhun naka bynta ban ban rung ha ka kyrdan jong ka Top-6, kaban plie lad pat ia ka ban ioh ban jam pat sha ka kyrdan iakhun ka Super Cup kaban sdang hadien ba kut ka SPL.
Kumta da kane ka jinghap ban pynsangeh noh ia kane ka jingiakhun kaba mynta ka sngi, la khmih lynti ba ka Tournament Committee jong ka SSA, kin hap ban ia shong naka bynta ban buh sngi thymmai pat ia kane ka jingiakhun bym shim la lah ban pynlong satia ia ka mynta ka sngi.
