Shillong, Nailar 30: U Nongialam barim ka Voice of the Peoples Party (VPP) na ri-lum Jaintia Bah Snarbor Laloo ula leit ai jingkyrshan ia u kyrtong ka NPP Dr DRL Nonglait ban iakhun ia ka elekshon shiteng samoi ka Shillong Lok Sabha na bad ong ba u kyrshan ia u briew ym ia ka seng.
Haba kren ha ka rynsan ialap elekshon ha Lawbyrtun ha Mawthadraishan ha ka sngi Saitjain, u Bah Laloo ula ong, ba ula shah suspon na ka VPP ryngkat bad u MLA ka North Shillong Bah Adelbert Nongrum namar ba ula kren ia ka jingshisha ha ka jingialang jong ka seng.
“Ka lynti iaid ka jong nga bad ka VPP, nga lah sdang ban iohi ia ki dak jingkylli. Nga ju iakren bad u President Bah Ardent Miller Basaiawmoit. Hadien ba nga lah iakren markhmat ha ka jingialang jong baroh ki nongialam na Khasi-Jaintia, nga lah shah suspon noh” ula ong.
“Ka long ka jingkyrkhu kaba na sha lyndet. Hadien ba lah shah suspon, ngi lah long laitluid bad ngi lah ban kyrshan iano iano ruh” ong u Bah Laloo.
Ula ong ba ka rai ka jongu ban kyrshan ia u Dr Nonglait kadei hadien ba ula dep ban wad bniah bha.
“Nga lah wad bniah bha bad shem ba u long u briew uba biang bad uba lah leh bun ki kam khlem da bunktien than. Kam pher lada u phong ia kano kano ka uniphom, ngi donkam ia kum une u briew. Ngam sngeweiei ia kano kano ka seng, nga kyrshan ia u Dr Nonglait,” ula ong.
U Bah Laloo ula buh jingkylli ruh ia ka seng VPP kaba la tuklar halor ka jingshim rai kaba dei ka kam iing kam sem jong ka NPP.
“Balei ka VPP ka hap ban kylli, balei ka NPP kam phah ia u Dr Nonglait sha Rajya Sabha hynrei sha Lok Sabha? Kadei ka hok jong ka NPP ba kan pynieng dano dano ruh. Balei ban tuklar ia ka kam jong kawei pat ka seng? Kane ka jingkylli kadei tang ban ialam bakla ia u paitbah” ula ong.
Da kaba iada ia ka NPP ba ka ju mlien ban pynlong ia ka jingbuh jingduwai hashwa ban pynbna kyrtong, ula ong, “Kum ki briew ngi don bun ki jingduna bad ngi donkam ia u Blei”.
Haba iaroh ia u Symbud Myntri Rangbah u Bah Sniawbhalang Dhar, u Bah Laloo ula ong, “Watla nga dei uba trei shitrhem ia ka VPP, nga lah iohi ia ki kam kiba bun kaba u Bah Sniawbhalang ula leh ha ka constituency jongu. Kaei kaba dei hap ban iaroh bad ia kaei kaba bakla dei ban kynthoh. Nga ai khublei ia u halor ka jingkyntiew ia kane ka thaiñ”.
Ula kob ruh ia ka VPP, da kaba ong, “Balei phim shim la leit khot hi dalade ia u Dr Nonglait?”
 na ri-lum Jaintia Bah Snarbor Laloo ula leit ai jingkyrshan ia u kyrtong ka NPP Dr DRL Nonglait ban iakhun ia ka elekshon shiteng samoi ka Shillong Lok Sabha na bad ong ba u kyrshan ia u briew ym ia ka seng.){kind=link}