Jer ia u Rang ialehkai phutbol barim Bah Richard Nongneng kum u Head Coach
Shillong, Iaiong 30: Ka Nongkseh Sports Social and Cultural Club (SS&CC) hynne ka sngi ka sngi kala soi ïa ki 12 ngut ki rangïalehkai ba thymmai ha ka Inter Club Transfer ka Shillong Sports Association (SSA) na ka bynta ka samoi ïalehkai First Division 2025.
Ka samoi iadie ïathied Player kala sdang naduh ka 21 haduh ka 30 tarik Iaiong bad kane kala ailad iaka Club ban thied ïa ki samla rang ïalehkai kiba tbit khamtam kiba bun na ki ki la ïalehkai ruh haka Shillong Premier League (SPL) bad ha ka I-League.
Napdeng ki nongïalehkai ba kongsan baka Nongkseh kala ioh thied ki kynthup ki nongïalehkai ba pawnam na ka Mawlai SC kaba la wan baar ha ka SPL kata u Khrawkupar Jana, uba la thep 9 kol ha ka SPL jong ka samoi ba la dep bad 12 kol ha ka Meghalaya State League 2024, u Midfielder Baiaikara Swer uba la thep 7 kol, ki Defender kata u Fullmoon Mukhim, u Wanboklang Lyngkhoi, bad u Banskhemlang Mawlong.
Ka Nongkseh kala ioh thied ruh ïa u samla Vickey Sharma na ka Langsning FC bad u Amand Biswa na ka Sawmer SC.
Na ka Pohkseh SC, ka Nongkseh kala ioh thied ïa u Mickey Tynsong, katba naka Ryntih kala ioh ïa u Meban Wahlang uba dei ruh rangïalehkai uba ju ialehkai ha I-League Second Division.
Ka Nongkseh ka la nang pynkhlaiñ shuh shuh ïa ki Player ap Goal da kaba soi ïa u Guidle Syiemlieh na ka kynhun ïalehkai ba la jop ia ka SPL kata ka Shillong Lajong FC.
Ka khubor kaba kham sngewtynnad ka long baka Nongkseh namar ka jinglah ban thied ïa u nongialehkai I-League u ba dei ruh u Captain barim ka Shillong Lajong kata u Hardy Cliff Nongbri uba don ruh iaka thong ban ban ïarap ïa ka Nongkseh ban ïoh ban kiew sha ka Shillong Premier League.
Ka Nongkseh SS&CC ka la ioh ruh ban pynïasoh ïa u u Kitboklang Pale na ka Lawsohtun SC.
Watla ka Nongkseh kala ioh thied bun ngut ki Player hynrei ka dang shaniah ha ka jingïalam u rangïalehkai ba shakhmat u Chesterpaul Lyngdoh, uba la noh synñiang palat 12 kol ha ka samoi ba la dep ha ryngkat bad ki 7 ngut ki Player baka Nongkseh ka dang iai bat.
Hadien ba ka la duh noh tang khyndiat eh ki Point ban kiew kyrdan ha u snem ba la dep, ka Nongkseh ka don ka jingkyrmen ba kane ka kynhun kaba thymmai kan lah ban kyntiew kyrdan iaka Club mynta ka samoi.
Ka Nongkseh kala thung da u Bah Richard Nongneng kum u Coach ba thymmai jong ka Club.
U bah Richard u la don bynta ha kane ka jingialehkai la bun snem bad u ioh ka burom bha ha ki nongkyrshan phutbol ha kylleng ka Jylla u ba la bat teng kum u Head Coach jong ka kynhun Meghalaya Police bad mynta u dang long u Coach ia ka kynhun jong ka ophis ka A.G. Meghalaya.
Ka Nongkseh ka dang pynkhreh mynta ban wanrah sa 3 ngut ki nongïalehkai ba la soi, kata u Chanmitre Thma, u Shano Tariang bad u Pynbhalang Suting lyngba ka Centralized Registration System (CRS), namar ba mynta ki dang ïalehkai na ka bynta ki Club ha Kolkata bad Nagaland.
Lah ban kdew ba la seng ïa ka Nongkseh SS&CC ha u snem 1969 bad ka dei kawei na ki Club ïalehkai phutbol ba rim bha ha nongbah Shillong. Ka Club ka la ïashim bynta shitrhem ha ka SSA League bad ka la mad ruh ïa ki jingeh ha ki snem ba ka la don.
Kala don ruh shisien ba ka Nongkseh kala kiew sha ka Super Division League (Shillong Premier League) ha u snem 2008.
 hynne ka sngi ka sngi kala soi ïa ki 12 ngut ki rangïalehkai ba thymmai ha ka Inter Club Transfer ka Shillong Sports Association (SSA) na ka bynta ka samoi ïalehkai First Division 2025.){kind=link}