Shillong, Jylliew 12 : U National General Secretary ka NPP bad Symbud Myntri Rangbah Bah Sniawbhalang Dhar ha ka sngi Balang, ula ong ba ka jingjop jong ka Voice of the People Party (VPP) ia ka elekshon Lok Sabha na Shillong, kan ym don jingktah satia ia ka elekshon MLA 2028, ka ba dang sah sa saw snem.
“Phin lah ban pyniasoh ia ka (elekshon Lok Sabha) bad ka elekshon MLA 2028. Hooid, ka don ka lad ia ka VPP ban pynbun ia ka seat hynrei phim lah ban khein troin namar ka NPP, UDP bad kiwei ki party ruh ki trei shitom naba ngi dang don por sa 3-4 snem” ong u Bah Sniawbha.
U Dr Ricky AJ Syngkon jong ka VPP ula pynliem ia u MP ba lai samoi ka Congress Vincent H Pala da palat 3.7 lak vote, ka jingjop ba bun eh hapoh ka Jylla.
Haba pynpaw ba kum kane ka jingjop kam dei shuh kaba thymmai ha Meghalaya, u bah Sniawbhalang ula ong “To ngin ia peit ia ka histori. Ha u 2019, u kyrtong ka Meghalaya Democratic Alliance (Bah Jemino Mawthoh) ula iakhun pyrshah ia u bah Vincent H Pala hynrei u Bah Pala ula ioh haduh 4 lak vote bad ka dei ruh ka jingjop ba bun bha. Ngi la jop tang na Khliehriat constituency”.
“Namar kata, ka elekshon MLA, MDC bad MP ki dei kiba iapher kawei na kawei pat. Kam mut ba ki (VPP) jop ia ka elekshon MP, kin ioh ia kajuh ka vote ha kiwei ki elekshon, kam treikam kumta” ula ong haba bynrap “U Bah Pala ula jip ha u 2019 da palat 2 lak vote hynrei ha u 2023, ka congress kala jop tang 4 seat (na Ri-lum Khasi Jaintia). Ta ka daw ki paidbah kila stad ban ia kaba phi pyrkhat. Kumta, phim dei ban khein troin ia ki nongthep vote jong ngi”.
Ula kubur ruh ba ki don ki nongkyrshan ka NPP na Nartiang constituency, ki ba khlem vote ia ka kyrtong ka Party. “Haba kyllo, ki ong namar ba phi dei ma phi uba ieng. Jin ba phi ieng ngin ym ieh satia ia phi” ong u bah Sniawbha.
Haba ai khublei ia u Dr Syngkon namar ka jingshah jied kum u MP ba thymmai ka Shillong, u Bah Sniawbha ula ong “Shimet hi, nga burom ia ka rai jong u paidbah bad nga ai khublei ia u Dr Syngkon halor ka jingshah jied kum u MP ba thymmai ka Shillong bad nga kyrmen ba un lah ban pynurlong ia baroh ki jingkular ba ula khlei sha ki paidbah ha ka por elekshon”.
“Nga ai khublei ruh ia ki nongkyrshan ka NPP watla ngim shym la jop. Nga ai khublei ia ki paidbah ka Nartiang constituency, kiba la ai palat 11000 vote sha ka kyrtong jong ngi” ula bynrap.
Nalor kane, u Bah Sniawbha ula kular ba ka NPP, kaba ialam ia ka Sorkar MDA, kan iai bteng ban shakri ia ki paidbah ka Jylla khlem ka jingpeit shiliang khmat ne leh shiliang.
Haba pyntip ruh ba ka jingshong bishar ia ka jingbym lah leh bha jong ka party kan sa don, une u Nongialam ka NPP ula ong “Ngin sa leh ia ka post mortem ban ithuh ia ki jingduna bad jingdkoh. Lada phi jop ne rem, phi donkam ban leh post mortem. Naba phi la rem bun bha, ka post mortem kan sa iaid bad ngin sa pyrshang ban pynbeit ia baroh ki jingdunba kum ka party bad kum ka Sorkar ruh kumjuh”.
Ha kajuh ka por, u Bah Sniawbha ula ong ba ka jingjop jong ka VPP ka lah ban ktah khyndiat khyndiat ia ka NPP ha ka elekshon MDC ha Khasi bad Jaintia Hills, kiba ka samoi treikam jong ki, la pynjlan da hynriew bnai. “Hynrei ngin trei shitom bha” ula bynrap.
 ia ka elekshon Lok Sabha na Shillong, kan ym don jingktah satia ia ka elekshon MLA 2028, ka ba dang sah sa saw snem.){kind=link}