Shillong, Rymphang 03: U Myntri Kam Pohiing barim ka jylla u Bah HDR Lyngdoh hynne ka sngi Thohdieng ula pynpaw ba u skhem jingmut ban jop iaka elekshon na Sohiong Constituency khnang ba yn lah ban maramot ia ki jingsniew bad jingjulor jong ka Constituency ha kine ki 5 snem kiba la leit.
Hadien ba la dep ka jingthep kyrteng kum u kyrtong ka UDP na Sohiong u Bah HDR Lyngdoh ula ong “Nga iohi iaka jingieid bad jingshaniah kaba ki paidbah ki don ha nga kumta ngan jop biang khlem kano kano ka jingeh. Ngan wanphai biang sha ka bor”.
“Nga la rai ban iakhun biang iaka elekshon kadei ban ioh maramot iaka jingjulor ha ka constituency ha kine ki 5 snem kiba la leit” ong u Bah HDR bad ka kyntu ia ki paidbah ba kidei ban bishar bniah iaka jingtreikam ka jongu MLA ba mynta u Bah Samlin Malngiang, uba la phet noh dang shen na ka HSPDP bad pyniasoh noh bad ka NPP.
Ula ong, ba ka jingmih noh ka jong u naka seng Congres ban pyniasoh pat bad ka UDP, kadei namar ba u kwah ban kyntiew ia ka jinglong riewlum ha ka jylla
“Kadei ka sur jong u paidbah, kila ïam bad ki thrang ba ka seng riewlum ka dei ban synshar noh iaka jylla mynta” ong u Bah HDR.
U Bah HDR ula ong ka rukom treikam jong ka NPP kaba ialam iaka sorkar MDA ka long kaba jur ka jingjulor bad ban pynbeit ia katei, kadei tang lada ka seng riewlum ka wan haka bor.
