Iohi ka Meghalaya ia bun bah ki jingkylla hapoh ka jingialam u Conrad Sangma
Shillong, Rymphang 14 : U Nongialam ka NPP bad Myntri Sorkar Marcuise N Marak ha ka sngi Balang, ula pynpaw ia ka jingsngewskhem ba ka NPP kan jop beit ia ka elekshon Lok Sabha 2024 na Shillong bad Tura Parliamentary constituency namar ka Jylla kala iohi ia bun bah ki jingkylla hapoh ka jingialam jong u Conrad K Sangma.
Haba iakren bad ki Nongthoh khubor, u Marak ula ong ba ka MP ka Tura Agatha K Sangma khlem pep, kan wanphai biang kum ka MP ha ka elekshon Lok Sabha ban wan.
“Ha Shillong ruh, ngi don jingkyrmen ban jop. Ngi la kyrpad ia ki paidbah ka Ri-lum Khasi Jaintia ruh ba ki ruh kin leit bad ka NPP naba ka NPP kala pyrshang katba lah hapoh ka jingialam u Conrad K Sangma. Phi lah dei ban iohi ba ka Jylla kala kylla bak ly bak mynta, kumta ngi kyrmen ban gin ioh ia ka jingkyrshan jong ki paidbah ka Jylla jong ngi” ula ong.
“Lada ngi don arngut ki MP ha Delhi, kan long kaba suk bha ia ngi ban tynruh ha ka ban lah pyllait lut ia baroh ki skhim bad ki project na ka Sorkar Pdeng” bynrap u Marak.
Halor ka jingkynnoh jong ka BJP bad ka Congress ha Ri-lum Garo, une u Nongialam ka NPP ula ong “Phi lah ban leit sha Ri-lum Garo bad shang shane shatai bad phin shem ia kaei kaba ka Agatha kala leh. Shibun kiei kiei ba ka Agatha kala leh. Shibun ki Iingskul kala pynioh pisa na ka MPLADS bad wat ki skhim ka Sorkar Pdeng ruh, ka dei ma ka ha lyndet ban pynioh ia ka song pisa jong ki project na Delhi”.
“Ki jingkynnoh na ka Congress, khlem pep kin pynmih beit ia kum kine ki jingkynnoh. Phi kylla na ngi shano ba ka don, ka don beit ryngkat bad ngi, ka don beit ha manla ki prokram” ula ong.
Ha kajuh ka por,u Marak u ong baka NPP kala shimkhia bha ia ki nongialehkai pyrshah la ki dei ki party kiba rit ne kiba heh.
