Shillong, Iaiong 04 : Ka Hills State People’s Party (HSPDP) kala sngewskhem ba u kyrteng ka Party un lah ban pynjop biang ia ka elekshon MLA ha Sohiong, watla u MLA barim Bah Samlin Malngiang ula phet noh na ka seng.
Watla arngut ki MLA ka HSPDP kila phet noh bad ieh ia ka party khlem ki MLA ban iakhun ia ka elekshon, hynrei kane ka seng riewlum kala lah ban jop biang ar seat bad ha kane ka kynti ruh, kine ki MLA ki dei kiba dang jop ha ka sien ba nyngkong.
U President Bah KP Pangniang uba la iakhun bad shah rem na Rambrai-Jyrngam constitituency, hynne ka sngi ba-ar ula pyntip ba u kyrtong na Sohiong constituency ula nang trei mynta hapoh ka constituency ba ula pynkhreh bha ia ka elekshon ban wan.
Haba kylli la ka jingsngewlem kan treikam na ka jingkhlad u Bah HDR Lyngdoh, u Bah Pangniang ula kyntait ban kynthoh eiei namar ba um don jingtip ia kaei kaba long ba man hapoh ka constituency. Ula bynrap ba kat kum ka jingioh khubor jong u, u kyrtong ka HSPDP ula pynkhreh bha ialade.
“Kumba phi tip ba u MLA ula ieh ia ka party, ta ka daw kam long kaba suk ia ngi ban mih iakhun watla ngi hap ban pynneh ia ka nongrim jong ka party bad ka vote bank ruh kumjuh. Ngi don ia u kyrtong uba biang bha Bah Sandondor Ryntathiang bad baroh kan shong ha ka rai u paidbah iano ba kin vote” ong u Bah Pangniang.
Haba kylli kumno u shim ia ka jingbym lah thaw pyrthei ka Party ha ka elekshon bala dep, u Bah Pangniang ula ong “Shuwa ban gin mih sha madan, ngi la don arngut ki MLA hynrei kine kila phet noh n aka party bad ngi la hap ban sdang biang khlem ki MLA hynrei watla katta ngi la ioh arngut ki MLA. Ngin ieng biang mynta ban pynkhlain ia ka party bad kane ka dei ka kamram jong ngi” ula ong.
