Shillong, Risaw 13 : U Myntri Rangbah ka Jylla Conrad K Sangma ha ka sngi U Blei ula sngewsih kthang halor ka jingiap noh jong u Nonghikai bala paw bha Brother Eric Steve D’Souza, u dkhot ka Kynhun ki Christian Brother, uba la pynlut bun bun snem ha Shillong bad hikai ha skul St.Edmund’s, Shillong.
With profound sorrow, I learned of the passing of Brother Eric Steve D’Souza, an exceptional educator renowned for his dedication to education and compassion. As an esteemed member of the Christian Brothers congregation, Brother D’Souza spent many years serving at St. Edmund’s… pic.twitter.com/tjS3LD7dbt
— Conrad K Sangma (@SangmaConrad) October 13, 2024
Haba thoh ha X, u Myntri Rangbah ula ong “Da ka jingsngewsih kthang, nga ioh jingtip ia ka jingkhlad noh u Brother Eric Steve D’Souza, u nonghikai bat bit bad ba paw bha halor ka jingaiti bad jingsngewtynnad ban pynphriang ia ka pule ka dangle. Kum u dkhot ka kynhun Christian Brothers, u Brother D’Souza ula pynlut bun bun snem ban shakri ha skul St. Edmund’s ha Shillong bad ieh shadien ia ki matti kibym lah ban klet. Ai ba ka nam ka burom u Brother D’Souza kan wanrah ia ka jingpyntngen ia ka Iing ka sem jong u,ki Christian Brothers bad ki jingim kiba ula pynkylla lyngba ka pule puthi bad ka jingieid. Ai ba ka mynsiem jong u kan ioh ia ka jingjah thait”
Lah ban kdew, u Myntri Rangbah ka Jylla ula pule ha skul St.Eedmund’s, Shillong shuwa ba un leit pule sha St. Columba’s School, New Delhi. U Brother D’Souza u dei uwei na ki nonghikai u Myntri Rangbah ha skul St.Edmund’s.
Ia ka jingkhlad noh u Brother D’Souza la pynbna da u Brother Solomon Morris, u Principal ba mynta jong ka skul St.Edmund’s, Shillong ha ka janmiet sngi U Blei. Kat kum ka jingong u Brother Morris, u Brother D’Souza ula khlad noh ha ka Sngi U Blei ha Regina Mundi, Goa hadien ka jingshitom kaba la ban la slem ia u.
U Brother Morris u pyntip ruh ba ia ka met jong u Brother D’Souza yn sa wanrah sha Shillong ban tep. Ka met ka lah ban wan poi ha ka sngi Ba-ar bad ka jingleit ontep kan long ha ka sngi Balang. U pyntip ba ia ki jingtip ba kham bniah yn sa ai kham hadien.
