Shillong, Jylliew 05 : U Myntri Rangbah ka Jylla Conrad K Sangma ula pynpaw ia ka jingsngewnguh ia ka Sorkar Pdeng ba ka tuklar halor ka kynrum kynram ka NEHU ha ka por kaba biang bad plie lynti ia ki bor pyniaid ba thymmai ba kan treikam kumba ju long.
“Nga kwah ban ai khublei ia ka Sorkar Pdeng bad baroh ki Myntri halor ka jingtuklar ha ka por kaba dei. Nga la shong katto katne ki jingialang ha ki kyrdan bapher bapher bad mynta ki kam kila sdang ban iaid shakhmat” ong u Conrad haba iakren bad ki nongthoh khubor.
“Ka jingialang jong ka Academic Council kala dep long bad la ai jingmynjur ban thung ia u Pro Vice Chancellor ba thymmai bad ngi la iohi ia ka bor pyniaid kaba thymmai kaba la sdang treikam” ula bynrap.
U Conrad ula ong ba u dap da ka jingsngewkmen ba la shimkhia bha ia ka bha ka miat jong ki samla pule. Hynrei ula pynpaw pat ba kaei kaba sngew bynniaw eh ka long ba kine ki jingjia baroh kila kylla long ki kam shimet ha ka jaka ban khmih ia ka bha ka miat jong ki samla pule.
“Nga sngewkmen eh ban iohi ba baroh kila buh ia ka bha ka miat ki samla pule hakhmat eh bad mynta kila iaid shakhmat khlem da iapein hynrei sngewbha sngewthuh ba ia ki jingmyntoi ki samla pule ym dei da lei lei ruh ban iapein” ula ong.
U Myntri Rangbah ula iai ban ba ka Sorkar Jylla ka don beit ha syndak ban iarap pyniaid ia ki kam bad ban wanrah ia ka jingiatreilang hynrei khatduh ka dei ka NEHU bad ka Sorkar Pdeng kiba hap ban trei borbah ha kaban pynbeit ia ki jingeh ka ban neh shirta.
“Kiei ki jingiarap kiba donkam na ngi, ngin don lang beit. Ngi la pyrshang kat kaba lah ban nga kmen ban iohi ba ngi la sdang iohi ia ka jingiaid beit ki kam ki jam haba phai sha ka jingpyniaid kam ha NEHU” ula ong.
Halor ka jingdawa weng ia u VC ka NEHU, u Conrad ula ong “Ka dei ka Sorkar Pdeng bad ka NEHU ka ban shim ia ka rai. Ngi la pynpaw ia ki jingsngew jong ngi, ngi la pyni ia kaei kaba ngi pyrkhat ka ban long ka lynti nangne shakhmat”.
